CAMBUL VİLAYƏTİNDƏ AZƏRBAYCAN MƏDƏNİYYƏTİ GÜNLƏRİ KEÇİRİLƏCƏK
Qazaxistanin Cambul vilayətinin icra hakimiyyəti, azərbaycanlıların Almatıdakı “Turan” konqresi və Cambuldakı Azərbaycan mədəniyyət mərkəzinin təşəbbüsü ilə bu ilin avqustunda vilayətin Çu şəhərində Azərbaycan mədəniyyəti günləri keçiriləcəkdir. Tədbirlərdə Almatı, Cənubi Qazaxıstan, Qərbi Qazaxıstan, Aktyubinsk, Pavlodar, Şərqi Qazaxıstan və başqa vilayətlərdə fəaliyyət göstərən Azərbaycan mahnı və rəqs ansamblları çıxış edəcək, adət-ənənələrimiz, tarix və ədəbiyyatımızla bağlı müsabiqələr təşkil olunacaqdır.
Cambuldakı Azərbaycan mədəniyyət mərkəzinin sədri Əli Nəcəfov AZƏRTAC-ın müxbiri ilə söhbətində demişdir ki, vilayətdə 25 mindən artıq azərbaycanlı yaşayır. Onların, demək olar ki, hamısının ata-babaları repressiya dövründə buraya sürgün edilmişdir. Qürbətdə yaşasaq da, dilimizi, dinimizi, adət-ənənələrimizi qoruyub saxlamışıq. Belə tədbirlərin keçirilməsində də məqsədimiz odur ki, yeniyetmələr və gənclər görüb-götürsünlər, mədəniyyətimizi, adət-ənənələrimizi yaddan çıxarmasınlar.
Qulu Kəngərli
AZƏRTAC-ın xüsusi müxbiri
Çu şəhəri
Bölmənin digər xəbərləri
