Cəlilabadda Dövlət Müstəqilliyinin Bərpasının 32-ci ildönümü qeyd olunub
Cəlilabad, 18 oktyabr, İlkin Adıyev, AZƏRTAC
Cəlilabad rayonunda Dövlət Müstəqilliyinin Bərpasının 32-ci ildönümü qeyd olunub.
AZƏRTAC-ın bölgə müxbiri xəbər verir ki, tədbirdə icra hakimiyyətinin məsul şəxsləri, hüquq-mühafizə orqanları, idarə, müəssisə və təşkilat rəhbərləri, rayon ictimaiyyətinin nümayəndələri iştirak ediblər.
Əvvəlcə Ulu Öndər Heydər Əliyevin Cəlilabad şəhərinin mərkəzində ucaldılan abidəsi ziyarət edilib, önünə tər güllər düzülüb.
Tədbirdə Ümummilli Lider Heydər Əliyevin və şəhidlərin əziz xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib.
Sonra dövlət müstəqilliyindən bəhs edən videoçarx nümayiş olunub.
Rayon icra hakimiyyətinin başçısı Rafiq Cəlilov çıxış edərək bildirib ki, Azərbaycan xalqı 1991-ci il oktyabrın 18-də bərpa etdiyi dövlət müstəqilliyini məhz Ümummilli Liderimiz Heydər Əliyevin rəhbərliyi altında möhkəmləndirdi. Ulu Öndərin gərgin fəaliyyəti sayəsində ölkəmiz inkişaf yoluna çıxdı. Bir sıra beynəlxalq təşkilatlara üzv seçilən Azərbaycan 2001-ci ildə Avropa Şurasına qəbul edildi. Bu gün Azərbaycan iqtisadi cəhətdən dünyanın ən sürətlə inkişaf edən ölkələrindəndir. Bütün bunlar müstəqil Azərbaycanın tarixi nailiyyətləridir. Vaxtilə Ulu Öndər Heydər Əliyev tərəfindən qorunub saxlanılan müstəqilliyimiz bu gün Prezident İlham Əliyevin rəhbərliyi ilə daha da möhkəmləndirilir və onun əbədiliyi təmin edilir.
Tədbirdə çıxış edənlər dövlət müstəqilliyinin bərpa edilməsini mühüm tarixi hadisə kimi qiymətləndirib, Ümummilli Lider Heydər Əliyevin müstəqilliyimizin möhkəmləndirilməsində və ölkəmizin dünyaya tanıdılmasındakı əvəzsiz xidmətlərini vurğulayıb, Prezident İlham Əliyevin apardığı uğurlu daxili və xarici siyasət nəticəsində respublikamızın dünyanın ən inkişaf etmiş ölkələrindən birinə çevrildiyini diqqətə çatdırıblar. Qeyd olunub ki, Müzəffər Ali Baş Komandan İlham Əliyevin rəhbərliyi ilə erməni işğalına son qoyulub, ərazi bütövlüyümüz təmin edilib və xalqımız dünyada qalib xalq kimi tanınıb.
Bölmənin digər xəbərləri
