Çaylarda suyun səviyyəsi artmışdır
Bakı, 19 aprel (AZƏRTAC). Ekologiya və Təbii Sərvətlər Nazirliyinin Milli Hidrometeorologiya Departamenti çayların mövcud vəziyyəti ilə bağlı apardığı araşdırmanın nəticələrini açıqlamışdır.
Nazirliyin mətbuat xidmətindən AZƏRTAC-a bildirmişlər ki, araşdırmaya görə, son üç gün ərzində ölkə ərazisində yağan yağışlar nəticəsində çaylarda suyun səviyyəsi artmışdır. Belə ki, Böyük Qafqaz çaylarında suyun səviyyəsində 2-10, Kiçik Qafqaz çaylarında 1-3, Lənkəran-Astara bölgəsi çaylarında isə 30-60 santimetr artım qeydə alınmışdır. Lakin aprelin 19-da çayların sululuğunda azalma müşahidə olunmuşdur.
Son 3-4 gün ərzində Kür çayının Qıraqkəsəmən məntəqəsində, Qanıx çayının Əyriçay məntəqəsində artım müşahidə olunmuşdur. Kür çayının Surra məntəqəsində suyun səviyyəsində 23, Şirvanda 30, Salyanda 40, Bankədə 11, Araz çayının Novruzlu məntəqəsində isə 28 santimetr artım qeydə alınmışdır.
Bütün məntəqələrdə suyun səviyyəsinin ötən ilin müvafiq dövrü ilə müqayisədə aşağı olduğu müəyyən edilmişdir.
Bölmənin digər xəbərləri
