Çayların sululuğu ilə bağlı araşdırmanın nəticələri açıqlanmışdır
Bakı, 13 sentyabr (AZƏRTAC). Ekologiya və Təbii Sərvətlər Nazirliyi sentyabrın 13-də çayların sululuğu ilə bağlı apardığı araşdırmanın nəticələrini açıqlamışdır.
Nazirliyin mətbuat xidmətindən AZƏRTAC-a bildirmişlər ki, araşdırmanın nəticələrinə əsasən, hazırda Böyük Qafqazın Quba-Xaçmaz bölgəsi çaylarında sululuq ongünlük normanın 30-120, Kiçik Qafqazın çaylarında 60-110, Lənkəran-Astara bölgəsi çaylarında 30-50, Naxçıvan Muxtar Respublikası çaylarında isə 50 faizini təşkil etmişdir.
Kür çayının Qıraqkəsəmən məntəqəsində suyun səviyyəsinin 3 santimetr artdığı, su sərfinin saniyədə 95 kubmetr olduğu müəyyən edilmişdir. Qanıx çayının Əyriçay məntəqəsində isə suyun səviyyəsi 6 santimetr azalmışdır. Bu məntəqədə su sərfi saniyədə 95,0 kubmetr təşkil etmişdir.
Kür çayının aşağı axınındakı əksər məntəqələrdə, eləcə də Araz çayının Novruzlu məntəqəsində suyun səviyyəsinin azalması müşahidə olunmuşdur.
Hazırda suyun səviyyəsi Kür çayının məntəqələrində - Surrada 335, Şirvanda 198, Salyanda 176, Bankədə 205, Araz çayının Novruzlu məntəqəsində isə 51 santimetrdir.
Bölmənin digər xəbərləri
