Çin və ABŞ rəsmiləri ticarət sazişinin icrasını müzakirə ediblər
Pekin, 8 may, AZƏRTAC
Çin və ABŞ-ın ticarət danışıqları üzrə ən yuxarı rəsmilərinin telefon danışığı zamanı ticarət sazişinin birinci mərhələsinin icrası məsələsi müzakirə olunub.
AZƏRTAC xəbər verir ki, Çin Dövlət Şurası sədrinin (Baş Nazir) müavini Liu Xı ilə Birləşmiş Ştatların ticarət nümayəndəsi Robert Laythayzer və Maliyyə naziri Stiven Mnuçin arasında baş tutan telefon danışığında iqtisadi-ticari məsələlərlə yanaşı, ictimai səhiyyə sahəsində əməkdaşlıq da müzakirə olunub. Tərəflər Çin-ABŞ ticarət sazişinin birinci mərhələsinin icrası üçün müvafiq şəraitin yaradılması ilə bağlı fikir mübadiləsi aparıblar.
Qeyd edək ki, 2018-ci ilin yazında iki ölkə arasında başlayan ticarət mübahisələri üzrə 2 ilə yaxın danışıqlar aparılıb. Nəhayət cari ilin yanvarında ticarət sazişinin birinci mərhələsi imzalanıb. Çin mənbələri kənd təsərrüfatı, müəllif hüquqlarının qorunması, valyuta mübadiləsi məzənnəsi, maliyyə xidmətləri, ticarət əməkdaşlığının genişləndirilməsi, texnoloji mübadilə sahələrində razılaşma əldə olunduğunu yazıb.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
