ÇİNDƏ QURAQLIQ
Çinin mərkəzi rayonları ardı kəsilməyən şiddətli yağışlardan ziyan çəkməkdə davam etdiyi bir vaxtda, ölkənin şərqindəki Şandun əyalətində son 100 ildə misli görünməmiş quraqlıq başlanmışdır. Bir milyona yaxın adam içməli su qıtlığından əziyyət çəkir.
İTAR-TASS-ın verdiyi xəbərə görə, havaların isti keçməsi nəticəsində ölkə ərazisinin bir neçə cənub əyalətlərindən keçən və Çinin paytaxtını cənubda yerləşən Xançjou şəhəri ilə birləşdirən Böyük Kanalın 130 kilometrlik hissəsi tamamilə qurumuşdur. Quraqlıq yüzlərlə hektar əkin sahəsini viran qoymuşdur. Təbii fəlakətdən daha çox ziyan çəkmiş Liaoçen şəhərində onun nəticələrini aradan qaldırmaq üçün 220 milyon yuandan (26,6 milyon dollardan) artıq vəsait ayrılmışdır. Kənd rayonlarına məhsulun, heç olmazsa, bir hissəsini xilas etmək üçün təcili qaydada 70 min avtomatik suvarma qurğusu çatdırılmışdır.
Bununla yanaşı, Şandun əyaləti hökuməti hadisələrin bu cür inkişafına hazır olmadıqlarını etiraf etmiş və yaxın vaxtlarda əyalətin suvarma sistemini modernləşdirməyə və hər cür hava şəraitində su ilə fasiləsiz təmin etməyə imkan verən proqram işləyib hazırlamağa söz vermişdir.
Bölmənin digər xəbərləri
