Çində şəhidlərimizin xatirəsi anılıb
Pekin, 29 sentyabr, AZƏRTAC
Azərbaycanın Çin Xalq Respublikasındakı səfirliyində 27 Sentyabr - Anım Günü ilə əlaqədar tədbir keçirilib.
AZƏRTAC xəbər verir ki, Çin ictimaiyyətinin nümayəndələrinin, bu ölkədə yaşayan və təhsil alan azərbaycanlıların, Türkiyənin və Pakistanın Pekindəki hərbi attaşelərinin iştirak etdikləri tədbirdə əvvəlcə səfirliyin ərazisindəki “Xarıbülbül” barelyefinin önünə gül dəstələri qoyulub, Azərbaycanın ərazi bütövlüyü və suverenliyi uğrunda canını fəda edənlərin xatirəsi bir dəqiqəlik sükutla yad edilib.
Səfir Bünyad Hüseynov Anım Gününün xalqımız üçün böyük əhəmiyyətdən söz açıb, bu tarixin Qələbəyə aparan yolun başlanğıc günü olduğunu deyib. Bildirib ki, 2020-ci il sentyabrın 27-də Ermənistan silahlı qüvvələrinin genişmiqyaslı hücumuna cavab olaraq Silahlı Qüvvələrin Ali Baş Komandanı, Prezident İlham Əliyevin göstərişinə əsasən, Azərbaycan BMT Nizamnaməsinin 51-ci maddəsinə uyğun olaraq özünümüdafiə hüququndan istifadə edərək, öz ərazisini və mülki əhalini qorumaq məqsədilə əks-hücum əməliyyatlarına başlayıb. Nəticədə Azərbaycan təxminən 30 ilə yaxın Ermənistanın işğalı altında olan ərazilərini azad edib.
Vətən müharibəsində mərdliklə döyüşən bütün əsgər və zabitlərimizin əsl qəhrəmanlıq nümayiş etdirdiyini vurğulayan diplomat əlavə edib ki, Qələbəmiz qəhrəman əsgər və zabitlərimizin, bizim üçün əbədi yaşayacaq şəhidlərimizin, qazilərimizin qanı və canı bahasına əldə olunub. “Bu, təkcə Azərbaycanın hərbi qələbəsi deyildi, həm də Cənubi Qafqaz regionunda tarixi ədalətin bərpası və beynəlxalq hüququn təmin olunması idi. Müzəffər Ordumuzun yazdığı tarix həm Azərbaycanın gələcək inkişafı və çiçəklənməsi üçün, həm də regionda dayanıqlı və uzunmüddətli sülhü, əmin-amanlığı və təhlükəsizliyi təmin edən möhkəm bünövrədir”, - deyə səfir B.Hüseynov bildirib. O, işğaldan azad edilən ərazilərdə aparılan bərpa-quruculuq işlərindən bəhs edib, keçmiş məcburi köçkünlərin doğma torpaqlarına ləyaqətlə qayıdışı üçün "Böyük Qayıdış" proqramının sürətlə icra edildiyini deyib.
Vətən müharibəsinin iştirakçısı, Azərbaycanın Çindəki hərbi attaşesi Teyfur Rüstəmov 44 gün davam edən bu müharibənin xalqımızın həmrəyliyinin, qəhrəmanlığının və mübarizə əzminin təcəssümü olduğunu bildirib. Müzəffər Ali Baş Komandanın rəhbərliyi altında rəşadətli Azərbaycan Silahlı Qüvvələrinin Füzuli, Cəbrayıl, Zəngilan, Qubadlı, Xocavənd, Suqovuşan və nəhayət, Qarabağın tacı Şuşa şəhərini işğaldan azad etdiyini, igid zabitlərimizin və əsgərlərimizin canı, qanı bahasına şanlı Azərbaycan Bayrağının doğma torpaqlarımızda yenidən dalğalandığını deyən hərbi attaşe bu Qələbənin həm də böyük tarixi ədalətin bərpası, xalqımızın milli ruhunun yüksəlişi olduğunu diqqətə çatdırıb. Vurğulayıb ki, bizim üzərimizə düşən ən önəmli vəzifə şəhidlərimizin xatirəsini uca tutmaqdır.
Sonra Vətən müharibəsindəki şanlı Zəfərimizə həsr olunan film nümayiş olunub, şəhidlərin əziz xatirəsinə ehsan süfrəsi açılıb.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
