Çinin ixracında azalma tendensiyası davam edir
Pekin, 8 iyun, AZƏRTAC
Çinin ixracı may ayında ötən ilin eyni dövrü ilə müqayisədə 3,3 faiz azalaraq 205,74 milyard ABŞ dolları təşkil edib. COVID-19 pandemiyasının dünya iqtisadiyyatına mənfi təsiri fonunda planetin ən böyük ixrcatçılarından olan Çinin xaricə məhsul satışındakı azalma tendensiyası yanvardan bəri davam edir.
AZƏRTAC xəbər verir ki, Çin Baş Gömrük Administrasiyasının açıqlamasına əsasən, ötən ay ölkənin ixracında azalma müşahidə olunsa da, bəzi məhsulların, o cümlədən COVID-19 infeksiyası ilə mübarizədə istifadə edilən avadanlıq və ləvazimatların, yüksək texnologiya məhsullarının, eləcə də kompüterlərin ixracı əhəmiyyətli dərəcədə artıb. Kompüterlərin ixracının artmasına səbəb bir çox ölkədə tətbiq olunan karantin rejimi ilə əlaqədar evdən işləmək məcburiyyəti səbəbindən kompüter və noutbuklara tələbatın çoxalmasıdır.
Mayda Çinin idxalında da azalma müşahidə olunub. Ötən ay Çinin idxalı əvvəlki ilin eyni dövrü ilə müqayisədə 16,7 faiz azalıb.
Administrasiya bununla belə ölkənin ixrac və idxalının milli valyuta olan yuan ifadəsində çoxaldığını açıqlayıb. Bu da təbii ki, ötən ay yuanın dollar qarşısındakı məzənnəsinin aşağı düşməsi ilə bağlıdır.
Ümumilikdə ölkənin xarici ticarəti ilin ilk 5 ayında 4,7 faiz azalıb.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
