ÇİRKAB XƏZƏRƏ AXIDILIR
Artıq yarım ildir ki, Ekologiya və Təbii Sərvətlər Nazirliyi Xəzərin dənizi sahil zolağının Azərbaycan sektorunda monitorinq keçirir. Nazirliyin mütəxəssisləri Neftçala, Salyan, Lənkəran, Astara rayonlarında, Sumqayıt və Bakı şəhərlərində ekoloji şəraiti araşdırmışlar. Onlar Xəzər dənizinin və çay axarlarının ekologiyasına antropogen təsiri də öyrənmişlər. Xəzər dənizinin Azərbaycan sektorundan götürülmüş suyun yoxlanmasının nəticələri məyusedici olmuşdur. Məsələn, ekspertlərin fikrincə, istehsal və məişət tullantıllarının təmizlənməsi və dezinfeksiyası üçün nəzərdə tutulan qurğular yararsız və acınacaqlı vəziyyətdədir, ya, ümumiyyətlə, işləmir, yaxud da öz funksiyalarını cəmi 8-10 faiz yerinə yetirir. Nəticədə, təmizlənməmiş suların əksər hissəsi Xəzər kimi nadir dənizə axıdılır və ətraf mühitə olduqca böyük ziyan vurur. Mütəxəssislər bəzi çimərlik zonalarında sahil zonasını araşdıraraq, bu qənaətə gəlmişlər ki, həmin yerlərdə çimmək təhlükəlidir. Ekoloji cəhətdən ən əlverişli şərait Bakının Hövsan qəsəbəsindədir. Burada təmizləyici qurğular nisbətən yaxşı işləyir.
Mütəxəssislərin fikrincə, aktual problemi həll etmək üçün hazırda yerli hakimiyyət orqanlarının sərəncamında olan təmizləyici qurğuların əksəriyyəti dəyişdirilməli və ya yenidən qurulmalıdır. Gələcək nəsillərimizin hansı ekoloji şəraitdə yaşayacaqları barədə indidən düşünmək lazımdır.
Bölmənin digər xəbərləri
