CİNAYƏTKAR DƏSTƏNİN BAŞÇISI MƏHV EDİLMİŞDİR
Milli Təhlükəsizlik Nazirliyi Sərhəd Qoşunlarının Zaqatala sərhəd dəstəsinin “N” zastavasının 4 nəfərdən ibarət sərhəd gözətçi naryadı 2002-ci il iyulun 12-də saat 23 radələrində xidmətdən qayıdarkən son illər respublikanın şimal-qərb bölgəsində vaxtaşırı qatı cinayətlər törədən Hacı Maqamedovun quldur dəstəsinin basqınına məruz qalmışdır.
Gecə vaxtı qəfil açılan atəş nəticəsində güllə yarası almış sərhədçilər özlərini itirməmiş, quldurlarla qeyri-bərabər döyüşdə əsl igidlik nümunələri göstərmişlər. Əsgər Təbriz Şahmurad oğlu Quliyev yaralı olmasına baxmayaraq, Hacı Maqamedovla əlbəyaxa döyüşə girişmiş və onu məhv etmişdir. Daha iki quldurun güllə yarası aldığı ehtimal edilir. Atışma nəticəsində sərhəd naryadından sıravi Anar Əliağa oğlu İsmayılov aldıgı güllə yarasından həlak olmuş, əsgərlər Cabir Əlisahib oğlu Murtuzov və Pərviz Mayıl oğlu Rüstəmov yüngül yaralanmışlar. Yaralı sərhədçilərə zəruri tibbi yardım göstərilmişdir.
2000-2001-çi illərdə Zaqatala və Balakən rayonları ərazisində bir sıra qətllər, terrorçuluq aksiyaları və digər ağır cinayətlər törətdiyinə görə axtarışda olan Balakən rayonunun Mahamalar kənd sakini Hacı Maqamedov və onun başçılıq etdiyi quldur dəstəsinin zərərsizləşdirilməsi üçün Respublika Prokurorluğu, daxili işlər və milli təhlükəsizlik nazirlikləri tərəfindən keçirilmiş tədbirlər nəticəsində indiyədək 23 quldur tutularaq, cinayət məsuliyyətinə cəlb olunmuşdur. Son döyüşdə başçısını itirmiş quldur dəstəsinin digər üzvlərinin tapılıb tutulması üçün birgə tədbirlər davam etdirilir. Qaçmış quldurların Dağıstanın sərhədyanı ərazilərində axtarışını təşkil etmək üçün Milli Təhlükəsizlikl Nazirliyinin xahişi ilə Rusiya Federasiyasının Sərhəd Qoşunları böyük qüvvələr ayırmışdır və vertolyotlardan istifadə olunmaqla genişmiqyaslı axtarışlar aparılır.
İyulun 13-də hadisə yerinə baxış zamanı Hacı Maqamedova məxsus bir ədəd 7,62 millimetr çaplı AKM tipli avtomat, 3 ədəd güllə darağı, xeyli güllə, 1 ədəd fotoaparat və bu il iyulun 11-də Balakən rayonunun “Şabalıdlıq” restoranına silahlı basqın zamanı oradan qarət olunmuş 3 ədəd mobil telefon, digər əşyalar və ərzaq aşkar olunaraq götürülmüş, istintaq orqanlarına təqdim edilmişdir.
Milli Təhlükəsizlik Nazirliyinin Sərhəd Qoşunları respublikanın şimal-qərb bölgəsində sərhəd pozucularına qarşı mübarizəni gücləndirmək üçün ötən ilin avqust-oktyabr aylarında Dağıstanla təmas zonalarının çətin keçirilən dağlıq-meşəlik ərazilərində 5 yeni zastava yaratmışdır. Sərhədlərimizin toxunulmazlığının təmin olunması üçün tədbirlər planlı surətdə davam etdirilir.
Milli Təhlükəsizlik Nazirliyi
Mətbuat Xidmətinin məlumatı
Bölmənin digər xəbərləri
