COP29-a həsr edilmiş “Diplomatiya Aləmi” jurnalının xüsusi buraxılışının təqdimatı olub YENİLƏNİB VİDEO
Bakı, 17 dekabr, AZƏRTAC
Xarici İşlər Nazirliyi tərəfindən nəşr edilən “Diplomatiya Aləmi” jurnalının 61/2025 saylı növbəti xüsusi buraxılışının ADA Universitetində təqdimat mərasimi keçirilib.
AZƏRTAC xəbər verir ki, jurnalın xüsusi buraxılışı “COP29: Yaşıl Dünya naminə Həmrəylik (COP29: In Solidarity for a Green World)” başlığı altında Azərbaycanın BMT-nin İqlim Dəyişmələri üzrə Çərçivə Konvensiyasının 29-cu sessiyası (COP29) sədrliyinə həsr olunub.
Tədbirdə çıxış edən Azərbaycan Prezidentinin iqlim məsələləri üzrə nümayəndəsi, COP29-un Prezidenti Muxtar Babayev jurnalın budəfəki xüsusi buraxılışını COP29-u və onun nəticələrini təqdim etmək, həmçinin ölkənin iqlim gündəliyinin gələcək inkişafı ilə bağlı vizyonunu bölüşmək baxımından yaxşı fürsət kimi qiymətləndirib.
O qeyd edib ki, COP29-un uğuru Azərbaycanın beynəlxalq iqlim müzakirələrinə gətirdiyi unikal ruh və vizyonla bağlıdır.
“COP29-a Azərbaycan Prezidenti İlham Əliyevin rəhbərliyi ilə 2024-cü ilin əvvəlindən etibarən hazırlaşmağa başladıq və bu mühüm prosesə start verdik. Əsas vizyonumuz, əsas missiyamız ölkələr arasında körpülər qurmaq idi. Düşünürəm ki, biz olduqca bu vacib missiyanı və məsuliyyətli tapşırığı uğurla yerinə yetirə bildik. Biz hazırlıq və danışıqlar mərhələsində müxtəlif ölkələrlə, müxtəlif maraqlı tərəflərlə davamlı və açıq ünsiyyət qurmağa çalışdıq. Xüsusilə 2024-cü il ərzində COP29-a hazırlıq prosesi çərçivəsində keçirilən çoxsaylı görüşlər, məsləhətləşmələr və platformalar qarşılıqlı anlaşmanın formalaşmasına mühüm töhfə verib. Məhz bu yanaşma COP29-un nəticələrinin daha inklüziv və balanslı olmasına şərait yaradıb”, - deyə M.Babayev vurğulayıb.
Azərbaycanın xarici işlər nazirinin müavini, COP29-un baş danışıqçısı Yalçın Rəfiyev vurğulayıb ki, qlobal səviyyədə gözləntilərin son dərəcə yüksək olduğu, çoxşaxəli və mürəkkəb beynəlxalq tədbirə bir ildən də az müddətdə hazırlaşmaq zərurəti həm planlaşdırma, həm də paralel proseslərin səmərəli idarə olunması baxımından ciddi çağırış yaradıb. Nazir müavini bütün bu çətinliklərə baxmayaraq COP29-un yüksəksəviyyəli təşkili və qəbul edilən qərarların Azərbaycan üçün beynəlxalq etimadın möhkəmləndirilməsi baxımından mühüm irs olduğuna da diqqət çəkib. Onun sözlərinə görə, Azərbaycan ölkələr arasında körpülər quran, dialoqa açıq və konstruktiv mövqe sərgiləyən sədr kimi çıxış edib. Bu yanaşma ölkəmizin qlobal proseslərdə etibarlı tərəfdaş kimi qəbul olunmasını daha da gücləndirib və diplomatik nüfuzunu əhəmiyyətli dərəcədə artırıb.
Azərbaycanın COP29 Sədrliyinin nümayəndəsi, Xarici İşlər Nazirliyinin Təhlil və Strateji Araşdırmalar İdarəsinin rəisi vəzifəsini icra edən Şahin Şahyarov qeyd edib ki, nəşrdə, həmçinin Azərbaycan Respublikasının COP29 Sədrliyinin yekunları, ölkəmizin qlobal iqlim diplomatiyasına verdiyi töhfələr, o cümlədən qəbul olunmuş sənədlər və COP29 Sədrliyinin fəaliyyət gündəliyi üzrə irəli sürülən təşəbbüslər, habelə COP üçlüyü formatında fəaliyyəti və COP30 çərçivəsində töhfələri barədə ətraflı məlumat təqdim olunur. “Biz jurnalın hər bir nəşrində Azərbaycanın müxtəlif məsələlər və mövzular üzrə strateji baxışını, eləcə də beynəlxalq əməkdaşlığa verdiyimiz töhfələri əks etdirməyə çalışırıq”, - deyə Ş.Şahyarov əlavə edib.
COP29 Əməliyyat Şirkətinin İdarə Heyətinin sədri və Əməliyyatlar üzrə baş icraçı Nərmin Carçalova isə ölkəmizdə 2024-cü ilin “Yaşıl dünya naminə həmrəylik ili” elan edilməsi haqqında Prezident İlham Əliyevin imzaladığı Sərəncamın COP29-a hazırlıq və onun icrası prosesində atılan addımların əsasını təşkil etdiyinə diqqət çəkib.
O qeyd edib ki, COP29-a hazırlıq dövründə müxtəlif platformalarda, o cümlədən beynəlxalq konfranslarda, çoxtərəfli tədbirlərdə və ikitərəfli görüşlərdə Azərbaycanın yaşıl enerji keçidi, iqlim dəyişikliyi ilə mübarizə və dayanıqlı inkişaf sahəsindəki prioritetləri ardıcıl şəkildə diqqətə çatdırılıb. Bu yanaşma ölkəmizin mövqelərinin daha aydın anlaşılmasına və beynəlxalq gündəlikdə layiqli şəkildə təmsil olunmasına imkan yaradıb. “Göstərilən səylər nəticəsində isə tərəfdaş ölkələrin, beynəlxalq təşkilatların və qlobal institutların etimadını və dəstəyini qazanmağa nail olmuşuq. Bu dəstək COP29 prosesinin uğurla həyata keçirilməsində və əldə olunan nəticələrin formalaşmasında mühüm rol oynayıb”, - deyə N.Carçalova əlavə edib.
Daha sonra Xarici İşlər Nazirliyinin Xüsusi tapşırıqlar üzrə səfiri Elşad İsgəndərov və nazirliyin İqlim diplomatiyası idarəsinin rəisi vəzifəsini icra edən Elçin Allahverdiyev “COP29 sədrliyinin fəaliyyət gündəliyi”, COP29-un İqlim dəyişmələri üzrə yüksəksəviyyəli çempionu Nigar Arpadarai və COP29-un iqlim üzrə gənclər çempionu Leyla Həsənova isə “İqlim çempionlarının COP29-a töhfələri” mövzuları ətrafında çıxış ediblər.
Sonda Qoşulmama Hərəkatı Gənclər Təşkilatının (QHGT) Tədqiqat Mərkəzinin fəaliyyəti təqdim olunub.
Qeyd edək ki, “Diplomatiya Aləmi” jurnalının 61/2025 saylı növbəti xüsusi buraxılışında Prezident İlham Əliyevin və Birinci vitse-prezident Mehriban Əliyevanın COP29 çərçivəsində keçirilən tədbirlərdə iştirakı və çıxışları, COP29 ilə bağlı xarici işlər naziri və Prezidentin iqlim məsələləri üzrə nümayəndəsinin, eləcə də digər rəsmi şəxslərin məqalələri yer alıb.
Nəşrdə, həmçinin Azərbaycanın COP29 sədrliyinin yekunları, ölkəmizin qlobal iqlim diplomatiyasına verdiyi töhfələr, o cümlədən qəbul olunmuş sənədlər və COP29 sədrliyinin fəaliyyət gündəliyi üzrə irəli sürülmüş təşəbbüslər, habelə COP üçlüyü formatında fəaliyyəti və COP30 çərçivəsində töhfələri barədə ətraflı məlumat təqdim olunur.
Bölmənin digər xəbərləri
