COP29 müsbət nəticələr və yüksək təşkilatçılıq baxımından tarixə düşəcək - ŞƏRH
Bakı, 27 noyabr, AZƏRTAC
Azərbaycan dünyada ən mötəbər tədbirlərdən biri hesab edilən BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına (COP29) uğurla ev sahibliyi etdi. İlk öncə onu qeyd etmək lazımdır ki, COP29-un Azərbaycanda keçirilməsi ilə bağlı yekdil qərar ötən ilin dekabrında qəbul olunmuşdu. Azərbaycan bir ildən də az vaxtda bu mötəbər tədbiri bütün qabaqcıl təcrübələr nəzərə alınmaqla ən yüksək səviyyədə təşkil etdi.
AZƏRTAC xəbər verir ki, bu sözləri Milli Məclisin deputatı Mircəlil Qasımlı söyləyib.
Azərbaycan Prezidenti İlham Əliyevin müdrik rəhbərliyi ilə ölkəmizin ötən illər ərzində böyük tarixi nailiyyətlərə imza atdığını qeyd edən Mircəlil Qasımlı bildirib ki, ötən illər ərzində respublikam;z mühüm beynəlxalq tədbirlərə, yarışlara uğurla ev sahibliyi edərək bu sahədə zəngin təcrübə əldə edib. COP29 isə həm miqyasına, həm də qlobal əhəmiyyətinə görə ölkəmizdə keçirilən ən mötəbər tədbir hesab edilir.
“Yaşıl dünya naminə həmrəy olaq!” şüarı ilə keçirilən COP29-un həm müsbət nəticələr, həm də yüksək təşkilatçılıq baxımından uğurlu COP-lardan biri kimi tarixə düşəcəyini bildirən deputat deyib: “Təbii ki, 80 dövlət və hökumət başçısının, 76 mindən çox iştirakçının qatıldığı COP29-da iqlim danışıqları üzrə tarixi nəticələrin əldə edilməsi, mühüm təşəbbüslərin dəstəklənməsi qlobal əhəmiyyətli uğurdur. Bu, beynəlxalq birliyin Azərbaycanın həmrəylik çağırışına dəstəyinin əyani təzahürüdür”.
M.Qasımlı bildirib ki, Paris Sazişinin uzun illərdir razılaşdırılmayan 6-cı maddəsi üzrə Bakıda ümumi razılığa gəlinməsi və bu maddənin tam şəkildə işlək vəziyyətə gətirilməsi COP29 Sədrliyinin əsas uğurlarındandır. Atmosferə buraxılan çirkli qazların həcminin azaldılması ilə bağlı öhdəlikləri müəyyənləşdirən bu maddənin işlək vəziyyətə gətirilməsi ətraf mühitin qorunması, iqlim dəyişiklikləri ilə mübarizədə önəmli addımdır.
“Təbii ki, inkişaf etməkdə olan ölkələrə ildə 300 milyard dollar həcmində vəsaitin ayrılması ilə bağlı qərar yaşıl iqtisadiyyata keçidin maliyyələşdirilməsini dəstəkləyən önəmli qərarlardandır. Qeyd edək ki, COP29-a qədər bu məbləğ 100 milyard dollar həcmində idi. Bu baxımdan müzakirələrin əvvəlində 200 milyard dollar məbləğində vəsaitin ayrılması üzrə fikir mübadiləsi aparılırdı. Lakin Azərbaycanın uğurlu moderatorluğu və yüksək diplomatik məharəti sayəsində yekun nəticədə 300 milyard dollar məbləğində vəsaitin ayrılmasına nail olundu. Həmçinin COP29 çərçivəsində 2035-ci ilə qədər inkişaf etməkdə olan ölkələrə 1,3 trilyon ABŞ dolları həcmində iqlim maliyyəsinin təmin edilməsi üçün yeni qlobal hədəfin müəyyənləşdirilməsi də mühüm uğurlardandır”, - deyə deputat vurğulayıb.
O, həmçinin bildirib ki, Azərbaycanın güclü beynəlxalq mövqeyi COP29-a Sədrliyin yüksək səviyyədə həyata keçirilməsini təmin edir.
Bölmənin digər xəbərləri
