“Czech Airlines” aviaşirkəti beynəlxalq reysləri bərpa edir
Bakı, 18 may, AZƏRTAC
“Czech Airlines” aviakompaniyası koronavirus pandemiyası səbəbindən dayandırılan bir sıra beynəlxalq reysləri mayın 18-dən bərpa edib.
AZƏRTAC Çexiya KİV-lərinə istinadla xəbər verir ki, bu barədə jurnalistlərə milli aviadaşıyıcının rəsmi nümayəndəsi Vladimira Dufkova deyib.
“Mayın 18-dən etibarən Praqanı Paris, Amsterdam və Frankfurt-Mayn şəhərləri ilə birləşdirən müntəzəm uçuşlar bərpa olunur. “Czech Airlines” mayın 21-dən Stokholma, mayın 24-dən Kiyevə, mayın 25-dən isə Odessa və Buxarestə uçuşlara başlayacaq”, - deyə Vladimira Dufkova bildirib. Onun sözlərinə görə, sərnişinlər və ekipaj üzvləri bütün uçuş müddəti ərzində tibbi maskada olmalı, eniş vaxtı və təyyarəni tərk edən zaman iki metrlik sosial distansiyanı saxlamalıdır.
İlk reyslər zamanı təyyarələr yarıboş uçacaq. Pandemiya səbəbindən ölkələr arasında hərəkətə qoyulan məhdudiyyətlər aradan qaldırıldıqdan sonra aviadaşımaların dirçələcəyi gözlənilir.
Bölmənin digər xəbərləri
