DAĞLIQ QARABAĞ MÜNAQİŞƏSİ İLƏ BAĞLI MƏSƏLƏ NATO PA-NIN NÖVBƏTİ SESSİYASINDA MÜZAKİRƏ OLUNACAQDIR
Milli Məclisin mətbuat xidmətindən bildirmişlər ki, sessiya çərçivəsində qurumun siyasi, müdafiə və təhlükəsizlik, iqtisadiyyat və təhlükəsizlik, elm və texnologiya komitələrinin, o cümlədən siyasi qrupların və Daimi Komitənin iclasları keçiriləcəkdir.
Müdafiə və təhlükəsizlik komitəsinin Gələcək təhlükəsizlik və müdafiə imkanları alt komitəsinin yığıncağında “Cənubi Qafqaz regionunda NATO-nun rolu” mövzusunda məruzə dinləniləcək, region ölkələrində vəziyyət, NATO ilə əlaqələrin inkişafı, fərdi əməkdaşlıq sahəsində görülmüş işlər və s. məsələlər ətrafında fikir mübadiləsi aparılacaqdır. Tədbirdə, həmçinin Ermənistan-Azərbaycan, Dağlıq Qarabağ münaqişəsi ilə bağlı müzakirələr keçiriləcəkdir.
Sessiyada NATO-nun Riqa sammitinə dair bəyannamənin qəbul edilməsi nəzərdə tutulmuşdur. Sənəddə Cənubi Qafqaz və Balkan ölkələrinə yardımın, təşkilata üzv dövlətlərdə demokratik standartların yerinə yetirilməsinin vacibliyi də öz əksini tapacaqdır.
Deputatlarımız müzakirələrdə iştirak edəcək, qaldırılacaq məsələlərə Azərbaycan tərəfinin mövqeyini bildirəcəklər.
Səfər noyabrın 19-dək davam edəcəkdir.
Bölmənin digər xəbərləri
