DAŞINMAZ ƏMLAKIN DÖVLƏT REYESTRİ XİDMƏTİNİN ƏRAZİ İDARƏLƏRİNDƏ ELEKTRON ARXİV YARADILIR
Daşınmaz Əmlakın Dövlət Reyestri Xidmətinin (DƏDRX) ərazi idarələrində arxiv təsərrüfatı üzrə çalışan mütəxəssislər üçün treninq keçirilmişdir.
AZƏRTAC xəbər verir ki, DƏDRX-nin inzibati binasındakı treninq mərkəzində keçirilmiş ilk tədbir qurum yaradılana qədər daşınmaz əmlakın inventarlaşdırılması, daşınmaz əmlak üzərində hüquqların qeydiyyatı ilə bağlı toplanmış arxiv sənədlərinin elektron variantının hazırlanması, hüquqi və fiziki şəxslərin mülkiyyətində əmlakın olub-olmaması barədə müvafiq qurumlardan daxil olan sorğuların cavablandırılması zamanı arxiv sənədlərindən istifadə və s. məsələlərə həsr edilmişdir.
Mülkiyyət hüquqlarına dair arxiv sənədlərinin əhəmiyyətindən danışan xidmət rəisinin müavini İlham Bayramov qurumun ərazi idarələrində elektron arxivin yaradılması ilə bağlı “Daşınmaz əmlakın qeydiyyatı” layihəsi çərçivəsində ayrıca subkomponent nəzərdə tutulduğunu bildirmişdir. Hazırda subkomponentin icrasına hazırlıq gedir. Eyni zamanda bu sahədə işlərin çoxluğu nəzərə alınaraq arxiv sənədlərinin elektron formata köçürülməsinə başlanmış və xidmətin bəzi ərazi idarələrində artıq bu proses başa çatmışdır.
İ.Bayramov elektron arxivə köçürülmüş mətn məlumatlarının yaxın gələcəkdə qrafik məlumatlarla birləşdiriləcəyini və ölkəmizdə daşınmaz əmlakın mükəmməl rəqəmli məlumat bazasının formalaşdırılacağını vurğulamışdır. Bu isə daşınmaz əmlakın idarə olunmasının şəffaflığına, etibarlılığına və səmərəliliyinə, Azərbaycanda elektron hökumətin qurulması işinə mühüm bir töhfə olacaqdır. Elektron arxivin yaradılması xidmətə müvafiq orqanlardan daxil olmuş sorğuların operativ və tam dəqiq cavablandırılmasını da təmin edəcəkdir.
Treninqdə xidmət əməkdaşlarına elektron arxivin qurulması işinin metodları, texniki xüsusiyyətləri, elektron arxivdən istifadə məsələləri ilə bağlı geniş məlumat verilmişdir.
######
 |
 |
