David Şerazadaşvili: Gürcüstanın inkişafı üçün sülh mühüm rol oynayır
Tbilisi, 18 oktyabr, AZƏRTAC
Bizim bütün ölkələrlə yaxın dostluq münasibətlərimiz var. Qonşu və dost Azərbaycan xalqı və dövləti ilə əlaqələrimiz isə bir qədər fərqlidir. Biz, eyni zamanda, strateji tərəfdaşıq, əlaqələrimiz başqa ölkələr üçün də nümunədir. Bizim hökumət və dövlət başçılarımızın həyata keçirdikləri məqsədyönlü siyasət nəticəsində birliyimiz və qardaşlığımız daha da möhkəmlənib. Hər iki ölkənin inkişafı üçün fikirlərimiz, mövqelərimiz eynidir. Biz birlikdə regionda da əmin-amanlığı qorumalıyıq.
Bu sözləri AZƏRTAC-a müsahibəsində Bolnisi rayonunun sabiq meri, deputatlığa namizəd David Şeradazaşvili söyləyib.
O deyib ki, bu gün Gürcüstan vətəndaşlarında ruh yüksəkliyi mövcuddur və bunun da bir çox səbəbləri var. Bu yüksək əhvali-ruhiyyəni “Gürcü Arzusu-Demokratik Gürcüstan” partiyası yaradıb. Bu partiya 12 ildir hakimiyyətdədir və bu dövr ərzində ölkədə sülh, əmin-amanlıq qorunub, iqtisadi inkişaf əldə olunub.
Partiyanın Bolnisi, Dmanisi, Tetritskaro (Ağbulaq) və Çalka üzrə təmsilçi seçilən David Şerazadaşvili uzun müddət Bolnisi rayonunun yerli özünü idarəetmə orqanında və mer vəzifəsində çalışıb.
“Son 12 ildə əhalinin sosial rifahının yaxşılaşdırılması üçün bir çox layihələr həyata keçirilib. Bolnisi bələdiyyəsi çoxmillətliliyi ilə fərqlənir və burada əhalinin böyük hissəsini azərbaycanlılar təşkil edir. Əsrlərdir biz qardaşlıq, dostluq, bir-birimizə hörmət şəraitində yaşayırıq. Ailə dəyərlərimizə hörməti bu günə qədər qoruyub saxlamışıq. Məhz bu sadiq seçicilərimiz sayəsində oktyabrın 26-da keçiriləcək parlament seçkilərində layiqli şəkildə qalib gələrək sabitlik, sülh və əmin-amanlıq içərisində yaşamağa davam edəcəyik”, - deyə o vurğulayıb.
D.Şeradazaşvili deyib ki, dünyada gedən prosesləri, qlobal vəziyyəti hamı yaxşı bilir. Bu gün Rusiya-Ukrayna müharibəsinin acı nəticələrini açıq-aydın görünür. Bu müharibədə minlərlə insan həlak olub. Bizi maraqlandıran yalnız sülhdür və kənar, eləcə də müxalif qüvvələrin təsirinə yol verməməliyik.
“Biz ailə dəyərlərimizə zidd olan LGBT və buna bənzər digər ünsürləri, onların təqdim etdiyi həyatı tanıya bilmərik. Bizim öz əxlaq və milli-mənəvi dəyərlərimiz var. Avropa İttifaqı, ABŞ və digər qüvvələrin təzyiq və təqiblərinə baxmayaraq, bu dəyərlərə qiymət verən gürcü xalqı mənfi ünsürlərə qarşı öz sözünü deyəcək”, - deyə D.Şeradazaşvili diqqətə çatdırıb.
Onun sözlərinə görə, Gürcüstanın inkişafı üçün sülh mühüm rol oynayır və bunun da qarantı məhz “Gürcü Arzusu-Demokratik Gürcüstan” partiyasıdır.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
