Dehlidəki bir neçə xəstəxanada bomba həyəcanı yaşanıb
Bakı, 14 may, AZƏRTAC
Hindistanın paytaxtı Dehli ərazisindəki bir neçə xəstəxanaya bomba təhlükəsi ilə bağlı məlumat daxil olub.
AZƏRTAC “Hindistan Times” saytına istinadla xəbər verir ki, elektron poçt vasitəsilə alınan təhdiddə xəstəxana ərazilərinə partlayıcılar qoyulduğu iddia edilib. Polis dərhal hərəkətə keçib və kütləvi axtarışlar aparmaq üçün xəstəxanalara xeyli sayda bomba zərərsizləşdirmə qrupları göndərib.
Hedgevar xəstəxanasının mühafizəsi üzrə məsul şəxs mediaya açıqlamasında xəstəxana binalarının hərtərəfli yoxlanılmasının aparıldığını, polis və bomba axtarış qruplarının işi nəzarətə götürdüyünü bildirib. Axtarış nəticəsində şübhəli heç nə aşkarlanmayıb.
Xatırladaq ki, bazar günü Dehlidəki İndira Qandi Beynəlxalq Hava Limanı və bir neçə xəstəxana da oxşar bomba təhdidləri alıb. Bu ayın əvvəlində paytaxtdakı 100-dən çox məktəbə eyni tipli mesajlar göndərilib.
Bölmənin digər xəbərləri
