DƏNİZDƏ PLATFORMALAR TƏMİR EDİLİR

07.11.2006 [10:55]
Çap et
A⁺ A^-

Azərbaycan Respublikası Dövlət Neft Şirkətindən (ARDNŞ) AZƏRTAC-a bildirmişlər ki, “Günəşli” yatağında dənizin 110 metr dərinliyində yerləşən 3 nömrəli stasionar platformanın əsaslı təmiri başa çatır. 1985-ci ildə istismara verilmiş və 24 quyunun qazıldığı platforma 50 il istifadə üçün nəzərdə tutulmuşdur. 21 il istismar edildikdən sonra platformanın kompleks təmirə ehtiyacı yaranmışdı. Təmir işlərini “Xəzərdənizneftqaztikinti” Trestinin 3 və 4 nömrəli tikinti-quraşdırma idarələrinin inşaatçıları həyata keçirirlər. İşlər 2-3 növbədə aparılır. Artıq platformanın 1-ci və 2-ci qatlarının 6 min kvadratmetrlik hissəsi dəyişdirilmişdir. Gəmilərin yanalma və vertolyot meydançalarının əsas konstruksiyaları da yeniləri ilə əvəz edilmişdir. 72 nəfərlik yaşayış bloku əsaslı təmir edilib. Hazırda kayutlar lazımi mebel və texnika ilə təchiz edilir.

Yenidənqurma və təmir işləri 1983-cü ildə inşa edilmiş 2 nömrəli platformada da uğurla həyata keçirilir. Bu gün həmin platformada 12 quyu fəaliyyət göstərir. Hər iki obyektin dekabr aylarında dövlət komissiyasına təhvil verilməsi nəzərdə tutulmuşdur.

“Azneft” İB-nin platformaların və hidrotexniki qurğuların tikintisi şöbəsinin rəisi Məsləhət Yunusov bildirmişdir ki, ARDNŞ-in və “Azneft” İB-nin rəhbərliyi tərəfindən təsdiq edilmiş proqrama əsasən, “Günəşli” yatağında hər il iki platformanın əsaslı təmiri həyata keçirilməlidir. 2005-ci ildə 6 və 9 nömrəli dəniz stasionar platformaları təmir edilmişdir. Gələn il 5 və 10 nömrəli platformaların təmiri nəzərdə tutulmuşdur. Təmir işləri dünya standartlarına uyğun aparılır. Bunun üçün lazımi maliyyə vəsaiti ayrılmış, inşaatçılar bütün materiallarla təmin edilmişlər.

DƏNİZDƏ PLATFORMALAR TƏMİR EDİLİR

MÜƏLLİFLƏ ƏLAQƏ

Bölmənin digər xəbərləri