Deputat: Azərbaycan bölgənin güclü iqtisadiyyatına sahib ölkə kimi nüfuzunu gündən-günə artırır
Bakı, 4 noyabr, AZƏRTAC
Prezident İlham Əliyevin və Birinci vitse-prezident Mehriban Əliyevanın İsmayıllı və Şamaxı rayonlarına növbəti səfəri ölkənin bütün regionlarının inkişafı məsələlərinin diqqətdə saxlanıldığını, respublikanın bütün bölgələrində geniş quruculuq və bərpa işlərinin aparıldığını deməyə əsas verir.
Dövlətimizin başçısı təkcə işğaldan azad olunmuş ərazilərə deyil, ölkənin digər bölgələrinə də ardıcıl səfərlər edir, görülən işlərlə şəxsən özü tanış olur. Prezident İlham Əliyevin tapşırıq və tövsiyələrinə əsasən ölkəmizin bütün şəhər, rayon və kəndlərdə geniş quruculuq işləri davam etdirilir. Tam əminliklə deyə bilərik ki, hazırda Qarabağın və Şərqi Zəngəzurun yenidən qurulması prioritet təşkil etsə də, digər bölgələrimiz də diqqətdən kənarda qalmır, orada da dinamik inkişaf davam edir.
Bu fikirləri AZƏRTAC-a açıqlamasında Milli Məclisin deputatı Ceyhun Məmmədov deyib.
Dövlətimizin siyasətində dini-tarixi abidələrimizin təmir və bərpasının xüsusi yer tutduğunu diqqətə çatdıran deputat deyib: “Lahıc qəsəbəsinə səfər zamanı 791-ci ildə inşa edilən Bədöyün məscidinin istifadəyə verilməsi bu fikri bir daha təsdiq edir. Qeyd etmək lazımdır ki, məsciddə bərpa-təmir işləri Heydər Əliyev Fondu tərəfindən həyata keçirilib. Fond tarixi, mədəni və dini abidələrin qorunub saxlanılması və bərpası istiqamətində son illər bir sıra mühüm layihələr həyata keçirib.
İsmayıllıya səfər çərçivəsində rayonda Basqal-Sulut avtomobil yolunun, Uşaq və Ailələrə Dəstək Mərkəzinin, İsmayıllı şəhər Natiq Behdiyev adına 6 saylı tam orta məktəbin yeni binasının istifadəyə verilməsi bu rayonda son illər həyata keçirilən böyük quruculuq və abadlıq işlərindən xəbər verir. Qeyd etmək lazımdır ki, son illər ölkəmizdə müasir təhsil infrastrukturunun yaradılması istiqamətində bir çox mühüm işlər həyata keçirilib. Son vaxtlar 3 mindən çox məktəb binasının tikilməsi və ya əsaslı bərpa olunması bu fikri bir daha təsdiq edir”.
C.Məmmədov qeyd edib ki, Şamaxıya səfər çərçivəsində də burada bir sıra yeni müəssisələrin açılışı oldu. Şamaxıda “Azərişıq” ASC-nin Şimal-Qərb Regional SCADA İdarəetmə Mərkəzinin istifadəyə verilməsi perspektivdə “Meysəri” yarımstansiyasının Şamaxı və İsmayıllı rayonlarının elektrik şəbəkələri vasitəsilə əlaqələndirilməsini təmin edəcək. Bu, eyni zamanda, son illər Azərbaycanda enerji təchizatı sahəsində görülmüş böyük işlərin göstəricisidir.
Deputatın sözlərinə görə, Şamaxı Yaradıcılıq Mərkəzinin, Şamaxı şəhər stadionunun açılması, uşaqların bilik və bacarıqlarının artırılmasına, yerli futbol ənənələrinin bərpasına, idmanın inkişafına, onun kütləviliyinin təmin olunmasına ciddi töhfə verəcək. Şamaxı Üzüm Tingçilik Mərkəzi, Şamaxıda Çarhan kənd orta məktəbinin yeni binasının, Pirsaat Baba ziyarətgah-məscid kompleksinin bərpa və yenidənqurma işlərindən sonra istifadəyə verilməsi bölgələrdə həyata keçirilən yüksək bərpa və quruculuq işlərindən xəbər verir.
“Bu gün Azərbaycanın bütün regionları hər bir sahədə sürətli inkişaf mərhələsinə qədəm qoyub. Azərbaycan bölgənin güclü iqtisadiyyatına və ordusuna sahib ölkə kimi nüfuzunu gündən-günə daha da artırır. Bütün bunlar Prezident İlham Əliyevin gərgin və fədakar əməyinin nəticəsidir”, - deyə C.Məmmədov fikirlərini tamamlayıb.
Bölmənin digər xəbərləri
