Bakı, 15 sentyabr, AZƏRTAC

Sentyabrın 12-dən 13-nə keçən gecə Azərbaycan Ermənistan təmas xəttində ermənilər tərəfindən törədilən hərbi təxribat bir daha Ermənistan rəhbərliyinin ikiüzlü, riyakar siyasət yeritdiyini sübuta yetirdi.

Bunu AZƏRTAC-a açıqlamasında Milli Məclisin deputatı Kamilə Əliyeva deyib.

Deputat diqqətə çatdırıb ki, Azərbaycan 2020-ci il noyabrın 10-da imzalanan üçtərəfli Bəyannamənin bütün bəndlərinə uyğun olaraq, öz üzərinə düşən öhdəlikləri yerinə yetirir. Ermənistan isə iki il vaxt keçməsinə baxmayaraq, hər dəfə müxtəlif bəhanələrlə üzərinə düşən öhdəlikləri yerinə yetirməkdən boyun qaçırır. Ermənistan rəhbərliyinin bu hərəkətləri 10 noyabr Bəyannaməsindən imtina etməsi anlamına gəlir. Kapitulyasiya aktına imza atan Ermənistanın baş naziri imdad üçün Avropa İttifaqına üz tutdu.

Prezident İlham Əliyevin düşünülmüş, uzaqgörən və müdrik xarici siyasəti nəticəsində Avropanın siyasi səhnəsində də Paşinyanın ağır məğlubiyyətə uğradığını qeyd edən deputat. Avropa Şurasının Prezidenti Şarl Mişelin vasitəçiliyi ilə baş tutan üçtərəfli görüşlərdə də Azərbaycanın milli maraqları nəzərə alınaraq Avropa İttifaqının rəsmisi tərəfindən bəyanatlar səsləndirildi. Ermənistan tərəfi Azərbaycanın irəli sürdüyü münasibətlərin nizamlanmasına dair 5 bənddən ibarət təklifini qəbul etdiyini bildirdi və sülh sazişinin imzalanması istiqamətində Azərbaycan və Ermənistan xarici işlər nazirlərinin görüşməsi və sülh sazişinin hazırlıq işlərinə başlamaları üçün öz razılığını bildirmişdi. Ermənistan rəhbərliyi üzdə bu razılaşmanı qəbul etsə də, yerinə yetirmədi. Bu gün Ermənistan müstəqil bir dövlət deyil və Ermənistana rəhbərlik edən şəxslər müstəqil siyasət yeritmək qabiliyyətində deyillər. Baş naziri Nikol Paşinyan Ermənistandan kənarda və ölkənin daxilindəki revanşist qüvvələrin fikirləri ilə hərəkət edir.

"Müzəffər Ali Baş Komandan, Azərbaycan Respublikasının Prezidenti İlham Əliyev dəfələrlə Ermənistan rəhbərliyinə və ermənilərin xaricdəki havadarlarına xəbərdarlıq etmişdir ki, əgər Azərbaycana qarşı nəinki silahlı təxribat, hətta təxribat xarakterli bəyanatlar versələr belə, nəticəsi çox ağır olacaq.

Ermənilərin törətdikləri son hərbi təxribatın qarşısını Azərbaycan Ordusu aldı və düşmənin silahlı qüvvələrinin təmas xəttinə yaxın və daha dərinliklərdəki hərbi texnikalarını və xeyli sayda canlı qüvvələrini məhv etdi. Həyata keçirilmiş uğurlu əks hərbi əməliyyatlar nəticəsində Azərbaycan Ordusu təxminən 100 kvadratkilometrlik ərazini və hakim yüksəklikləri ələ keçirdi. Bu gün Ermənistan rəhbərliyi bütün dünyaya car çəkir ki, guya Azərbaycan Ordusu Ermənistan ərazisinə daxil olub. Əslində Azərbaycan Ordusu Azərbaycanla Ermənistan arasında delimitasiya və demarkasiya olunmamış əraziləri ələ keçirib. Azərbaycanın hüququ var ki, öz ərazisinin təhlükəsizliyini təmin etmək üçün bu ərazilərdə bufer zona yaratsın. Bu gün Azərbaycan Silahlı Qüvvələri Xankəndidən Ermənistana və Qafandan İrəvana gedən bütün yollara nəzarət edir.

Ermənistan rəhbərliyinin bu təxribatlara əl atmasının arxasında bir sıra məkrli niyyətlər dayanır. Ermənistan təxribat törətməklə vaxt uzatmaq və sülh sazişinin imzalanması prosesini pozmağa çalışır. Əslində, ermənilərin bu yolla vaxt uzatmaları onların əleyhinə işləyir və Azərbaycan Ordusu tərəfindən bu təxribatların qarşısı çox sərt şəkildə alınır. Nəticədə yüzlərlə erməni hərbiçisi Azərbaycan Ordusu tərəfindən məhv edilir və milyard dollar xərcləyərək aldıqları hərbi texnikaları, yaratdıqları hərbi infrastrukturlar və hərbi hissələr Azərbaycan Silahlı Qüvvələri tərəfindən darmadağın edilir. Onsuz da dilənçi və rəzil gündə yaşayan Ermənistana bu hərbi hissələri yenidən qurmaq üçün uzun illər lazımdır.

Ermənistanın siyasi rəhbərliyi hələ bir neçə ay bundan əvvəl bu təxribatlara hazırlıq görürdü. Laçın və Kəlbəcər rayonları ilə sərhəddə çoxsaylı hərbi texnika cəmləşdirir, burada yeni hərbi hissələr yaradır və hərbi qulluqçuların sayını artırırdı. Azərbaycan tərəfi ermənilərin təxribata əl atacağını əvvəldən bilirdi. Çünki 2020-ci ilin iyulunda baş vermiş Tovuz hadisələri ilə budəfəki təxribatlar eynilik təşkil edirdi. Tovuz istiqamətində ermənilərin hərbi texnika cəmləşdirməsi və müharibəyə hazırlaşmaları barədə Azərbaycan Prezidenti İlham Əliyev bütün beynəlxalq təşkilatlara müraciət etmişdir. Lakin beynəlxalq təşkilatlar Ermənistana heç bir təsir göstərmədilər", - deyə K.Əliyeva bildirib.

Deputat vurğulayıb ki, 2020-ci il iyulun 12-də Ermənistan silahlı qüvvələrinin Azərbaycan dövlətinə qarşı törətdiyi irimiqyaslı hərbi təxribatlar zamanı şəhid generalımız Polad Həşimov başda olmaqla Azərbaycan oğulları ermənilərə qəhrəmanlıq, mərdlik dərsi verdilər. Tovuz hadisələri zamanı ermənilərin əsas məqsədi beynəlxalq təşkilatları və ölkələri bu münaqişəyə cəlb etmək, Qarabağ və Şərqi Zəngəzur torpaqlarını işğalda saxlamaq idi. Lakin onların bu arzusu da puç oldu. Azərbaycanın apardığı mübarizə haqq işi idi və beynəlxalq hüququn prinsiplərinə söykənirdi.

Bu il sentyabrın 12-dən 13-nə keçən gecə Ermənistan hərbçilərinin Azərbaycanın Laçın, Kəlbəcər, Daşkəsən və Zəngilan rayonları ilə sərhəddə törətdikləri təxribatın qarşısı Azərbaycan Silahlı Qüvvələri tərəfindən daha sərt və tutarlı həmlə ilə alındı. Artıq Azərbaycan öz torpaqlarını işğaldan azad edib.

“Azərbaycan Ordusu Ermənistan ərazisində yerləşən və Azərbaycanın suverenliyinə və ərazi bütövlüyünə təhdid törədən, hərbçilərimizin və mülki vətəndaşlarımızın həyatına təhlükə yaradan bütün hərbi infrastrukturu məhv etdi.

Bu gün Ermənistan təəssüf ki, Azərbaycan dövlətinin gücünü və qüdrətini qiymətləndirə bilmir. Ermənilər başa düşməlidilər ki, Azərbaycan kimi istər siyasi, istər iqtisadi, istərsə də hərbi cəhətdən güclü, eyni zamanda, artıq dünyada söz sahibinə çevrilən bir ölkə ilə zor dili ilə danışa bilməz. Azərbaycanın nə qədər güclü bir dövlət olduğunu 2016-cı ilin aprelində, 2020-ci ilin iyulunda və 2020-ci ilin 27 sentyabrından 10 noyabrına qədər davam edən Vətən müharibəsində ermənilər başa düşməli idilər. Təəssüflər olsun ki, Ermənistan bu gün reallığı qəbul edə bilmir və hər dəfə dəmir yumruq başlarına enəndə bütün dünyaya yalvarmağa başlayırlar. Sonuncu döyüşdə də Azərbaycan Ordusu şəhidlər verdi. İgid oğullarımız yenə də erməniləri hərb meydanında diz çökdürdü. Yeddi saatlıq döyüşlərdə Azərbaycan Ordusu Ermənistan silahlı qüvvələrini və hərbi texnikalarını yerlə yeksan etdi. İlkin məlumatlara görə ermənilər tərəfindən ölənlərin sayı ən azı 150-200 nəfərdir. Bu hərbi qələbəmizlə Silahlı Qüvvələrimiz bir daha bütün dünyaya bəyan etdi ki, Azərbaycanın ərazi bütövlüyünə təhlükə yaranarsa və Azərbaycan əsgəri qətlə yetirilərsə, bunun cavabı çox ağır olacaq”, - deyə K.Əliyeva vurğulayıb.