Deputat: Laçın aeroportu logistik mərkəzlərin yaradılmasına töhfə verəcək
Bakı, 29 noyabr, AZƏRTAC
Birinci Qarabağ müharibəsində Laçını hamı - ərazi özünümüdafiə taboru, əhali, ordu hissələri və milislər qoruyurdu. Amma müdafiə yetərli olmadığı üçün Laçın rayonu 1992-ci il mayın 18-də işğal olundu. Rayonun işğal edilməsi ordumuzun vəziyyətini çətinləşdirdi, çünki Ermənistan keçmiş Dağlıq Qarabağ ərazisinə rahat gedə bilmək imkanı əldə etmişdi. İşğal nəticəsində Laçının əhalisi öz evlərini tərk etdi, 300-dən artıq hərbi və mülki şəxs həlak oldu, itkin düşdü.
İşğalçı Ermənistan Cenevrə Konvensiyaları ilə üzərinə düşən öhdəliklərini kobud şəkildə pozaraq, Laçın rayonunda coğrafi adların dəyişdirilməsi, rayonun təbii resurslarının talan edilməsi və qazanc mənbəyinə çevrilməsi, əsasən, Suriyadan olan erməni əsilli qaçqınlar olmaqla məqsəd¬yön¬lü məskunlaşma siyasəti apararaq demoqrafik tərkibin dəyişdirilməsi kimi qeyri-qanuni əməl¬lər törədirdi. Beynəlxalq təşkilatlar “Ermənistan- Azərbaycan, Dağlıq Qarabağ münaqişəsi” kimi tanıdı¬lan ədalətsiz məsələni həll edə bilmədi. Bundan istifadə edən işğalçı dövlət sülh danışıqlarından yayınır, regionda möv¬cud status-kvonu saxlamağa çalışırdı.
Bu fikirləri AZƏRTAC-a açıqlamasında Milli Məclisin deputatı Səbinə Xasayeva söyləyib.
Deputat bildirib ki, 2020-ci ildə Azərbaycan Silahlı Qüvvələri Müzəffər Ali Baş Komandan, Prezident İlham Əliyevin rəhbərliyi ilə Vətən müharibəsində qazandığı Zəfərlə düşməni torpaqlarımızdan çıxardı, ərazi bütövlüyümüz təmin edildi. Onun sözlərinə görə, Qubadlı, Cəbrayıl, Füzuli, Zəngilan, Şuşa bir-birinin ardınca işğaldan azad edildikdən sonra rəşadətli Ordumuz qarşısında tab gətirə bilməyən Ermənistan üçtərəfli Bəyanat imzalamağa məcbur oldu. Bəyanata əsasən, Ermənistan silahlı birləşmələri Kəlbəcər, Laçın və Ağdam rayonlarından döyüşsüz çıxmalı idi və çıxdı da. Laçın artıq azaddır və yenidən bizimdir.
“İşğaldan azad edilən ərazilərdə hazırda nəhəng quruculuq və tikinti işləri aparılır, infrastruktur qurulur, yollar inşa edilir. Prezident İlham Əliyevin Sərəncamına əsasən tikilən Kəlbə¬cər-Laçın avtomobil yolunun uzunluğu 72,8 kilometrdir. Birinci və ikinci texniki dərəcəyə uyğun tikiləcək yolun hərəkət hissəsinin eni 9-16 metr olacaq. İki və dörd hərəkət zolaqlı olacaq yol üzərində altkeçidlər və körpü inşa olunacaq. Yol üzərində 3 tunel də tikiləcək. Tunellərin ümumi uzunluğu 9450 metr olacaq.
Laçında hava limanının inşası bölgənin bey¬nəl¬xalq statusunu artıracaq. Rayonun Qorçu kəndinin ərazisində inşa ediləcək hava limanı bir neçə mühüm amili özündə birləşdirir. Burada aeroportun tikilməsi ümumilikdə bölgənin sosial-iqtisadi inkişafına təkan verəcək və turizm potensialını artıracaq. Laçın hava limanının inşası həm də işğaldan azad edilmiş torpaqlarımızda aparılan abadlıq-quruculuq işlərinin miqya¬sı¬nın göstəricisidir. Laçın aeroportu logistik mərkəzlərin yaradılmasına da töhfə verəcək. Uçuş-enmə zolağının uzunluğunun 3 kilometr olacağı hava limanında 6 təyyarə dayanacağının inşasına imkan verir”, - deyə Səbinə Xasayeva qeyd edib.
Laçının Böyük Qayıdış ərəfəsində olduğunu vurğulayan deputatın sözlərinə görə, işğaldan azad edilmiş ərazilərə Böyük Qayıdışa dair I Dövlət Proqramının icrası nəticəsində bütün rayonlarımız kimi Laçın da iqtisadi cəhətdən güclənəcək, əhalinin firavan yaşayışı üçün bütün imkanlar yaradılacaq.
Bölmənin digər xəbərləri
