Deputat: Şotlandiya parlamentində təqdim olunan anti-Azərbaycan layihə əsassız ittihamlar üzərində qurulub
Bakı, 26 sentyabr, AZƏRTAC
Bir neçə gün əvvəl Şotlandiya Milli Partiyasının üzvü Kennet Gibson tərəfindən keçmiş “Ermənistan-Azərbaycan münaqişəsi” ilə bağlı təxribatçı və qərəzli təşəbbüs layihəsi irəli sürülüb. Şotlandiya parlamentinin rəsmi internet səhifəsində yerləşdirilən bu sənəddə Azərbaycana qarşı əsassız və ədalətsiz ittihamlar yer alıb. Belə ki, layihədə Azərbaycanın Qarabağ bölgəsi “mübahisəli” ərazi kimi təqdim edilib, oradan erməniəsilli şəxslərin guya zorla çıxarıldığı, erməni mədəni və dini irsinin sistemli şəkildə dağıdıldığı və digər ittihamlar yalan və əsassız ifadələr əks olunub.
İlk növbədə, vurğulanmalıdır ki, K.Gibsonun Azərbaycanın öz ərazilərini azad etməsinin işğal kimi qeyd etməsi qəbuledilməzdir. Azərbaycanın ayrılmaz tərkib hissəsi olan Qarabağ bölgəsi 30 ilə yaxın Ermənistan tərəfindən işğal altında olub. Ölkəmizin işğal altındakı ərazilərini beynəlxalq hüququn norma və prinsiplərinə uyğun şəkildə azad etməsi məqsədilə həyata keçirdiyi bütün zəruri tədbirlər Azərbaycanın suveren hüququdur.
İkincisi, qeyd etmək lazımdır ki, sənəddə göstərilən qondarma qurum 750 min azərbaycanlının zorla qovulduğu Qarabağda yaradılmış separatçı rejimdən başqa bir şey deyildi.
Bu fikirləri AZƏRTAC-a açıqlamasında Milli Məclisin deputatı Zaur Şükürov söyləyib.
Deputat, həmçinin qeyd edib: “Məlumdur ki, məhz Ermənistan Azərbaycan ərazilərini 30 ilə yaxın işğal altında saxlayıb, həmin torpaqlarda mövcud olmuş tarixi, mədəni, dini abidələrimizi məhv edib, Xocalı soyqırımı və digər kütləvi qırğınlar, insanlığa qarşı cinayətlər törədib, bir milyona yaxın azərbaycanlını doğma yurdlarından didərgin salıb, yüz minlərlə azərbaycanlını dəfələrlə tarixi torpaqlarından deportasiya edib. Tarix boyu ölkəmizə və xalqımıza qarşı cinayətlər törətmiş Ermənistanın sözügedən təşəbbüs layihəsində zərər çəkmiş, qurban ölkə qismində təqdim olunması siyasi riyakarlıq və ikili standartların bariz nümunəsidir.
Sözsüz ki, antiterror tədbirlərinin ildönümü ərəfəsində Ermənistan və ermənipərəst qüvvələrin fəallaşaraq müxtəlif platformalarda təxribatçı addımlar atacağı gözlənilən idi. Azərbaycan Prezidenti İlham Əliyevin yeddinci çağırış Milli Məclisin ilk iclasında proqram xarakterli nitqində qeyd etdiyi kimi: “Ermənistanın arxasında dayanan ölkələr, onların fəaliyyəti, onların qəbul etdikləri qərarlar, qətnamələr, açıqlamalar - bütün bunlar onu göstərir ki, bizə qarşı bu çirkin oyun hələ bitməyib. Bizim Qələbəmizi həzm edə bilməyən xarici dairələr bizə qarşı yeni planlar hazırlayır”.
Zaur Şükürov diqqətə çatdırıb ki, təşəbbüs layihəsinin sonunda qeyd edilən “Şotlandiya parlamenti regionda ədalətli və davamlı sülh arzusunu ifadə edir” sözləri isə reallığı qətiyyən əks etdirmir, əksinə, layihədə yer alan fikirlər bölgədə vəziyyəti gərginləşdirməyə, Ermənistanda revanşist qüvvələrin baş qaldırmasına xidmət edir. Təxribat xarakterli bu cür addımlar isə Azərbaycanla Birləşmiş Krallıq arasında təşəkkül tapmış səmərəli əməkdaşlıq əlaqələrinin ruhu ilə uzlaşmır.
Onun sözlərinə görə, diqqətçəkən məqam ondan ibarətdir ki, əsrlər boyu müstəmləkəçilik siyasəti yürütmüş, müxtəlif ərazilərdə yaşayan yerli əhaliyə qarşı cinayətlər törətmiş dövlətlərin bu gün Azərbaycana ədalət və hüquq dərsi keçməyə haqqı çatmır. Dövlətimizin başçısının Milli Məclisdə çıxışı zamanı qeyd etdiyi kimi: “...müstəqil, prinsipial xarici siyasət bizim əsas istiqamətimizdir. Biz heç kimə qarşı heç vaxt heç bir iş görməmişdik, heç kimin işinə qarışmamışdıq. Amma bizim işimizə qarışmaq istəyənlərə də hər dəfə dərs vermişik ki, bunu etməsinlər. Belə cəhdlər var, olacaq. Düzdür, onların heç bir əhəmiyyəti yoxdur. Ancaq bizim xarici siyasət istiqamətində bu amil təbii olaraq həmişə nəzərə alınacaq. Kim bizimlə ikitərəfli formatda, qarşılıqlı hörmət əsasında əməkdaşlıq etmək istəyirsə, biz ikiqat əməkdaşlıq edəcəyik. Amma əgər kimsə hesab edir ki, bizə gəlib nəsə diktə edəcək, yaxud da ki, bizi əsassız olaraq ittiham edəcək, ya da ki, hansısa vasitələrlə bizi qaralayacaq və sanki heç nə olmamış kimi bu ölkələrlə biz dostluq edəcəyik, bu, səhv təsəvvürdür, bu, olmayacaq!”
“Qeyd olunanlar onu deməyə əsas verir ki, özünü sülhsevər ölkə kimi qələmə verən Ermənistanın niyyəti, əslində, Azərbaycana qarşı təxribatlarını və qarayaxma kampaniyasını öz havadarları vasitəsilə davam etdirməkdir. Bütün bu kimi cəhdlər, o cümlədən Ermənistanın müzakirə mərhələsində olan və hələ tam razılaşdırılmamış sülh sazişini tələsik imzalamaq istəyi, həmçinin bu ölkənin konstitusiyasında Azərbaycana qarşı hələ də ərazi iddialarının qalması qonşu dövlətin regionda davamlı və dayanıqlı sülhdə maraqlı olmamasından xəbər verir”, - deyən deputat qeyd edib ki, layihəyə qoşulan 8 deputatdan birinin Kris Lounun (Ermənistanın Britaniya parlamentində ən yaxın havadarlarından biri) olması bu təşəbbüsün erməni lobbisinin fəaliyyətinin nəticəsi olduğunu göstərir. Digər tərəfdən, Şotlandiya Milli Partiyası iyulun 4-də keçirilmiş parlament seçkilərində 48 yerdən 39-nu itirib. Elə buna görədir ki, partiya üzvləri bu vasitə ilə siyasi müstəvidə aktuallıqlarını qoruyub saxlamağa çalışırlar.
Bölmənin digər xəbərləri
