Dohada keçirilən tədbirdə ermənilərin azərbaycanlılara qarşı törətdikləri qətliamlardan danışılıb
Bakı, 26 fevral, AZƏRTAC
Azərbaycanın Qətərdəki səfirliyinin təşkilatçılığı ilə Xocalı soyqırımının 24-cü ildönümünə həsr olunan anım tədbiri keçirilib.
Səfirlikdən AZƏRTAC-a bildiriblər ki, tədbirdə Qətərdə akkreditə olunmuş diplomatik korpusun, ictimaiyyətin nümayəndələri, KİV təmsilçiləri və bu ölkədə yaşayan azərbaycanlılar iştirak ediblər.
Səfir Tofiq Abdullayev çıxış edərək Xocalı faciəsi və Azərbaycan-Ermənistan münaqişəsi haqqında məlumat verib. Ermənilərin Azərbaycan xalqına qarşı dəfələrlə qırğınlar törətdiklərini qeyd edən səfir Xocalı soyqırımının bəşəriyyət tarixində misli görünməmiş amansızlıqla törədilən ən qanlı və unudulmaz faciələrdən biri olduğunu vurğulayıb. O, Azərbaycan xalqına qarşı Xocalı soyqırımını törədənlərin indiyədək cəzasız qalmasının təəssüf doğurduğunu qeyd edib.
Səfir Xocalı həqiqətlərinin dünya ictimaiyyətinə çatdırılmasının zəruriliyini bildirib. Bu istiqamətdə həyata keçirilən “Xocalıya ədalət!” kampaniyası çərçivəsində böyük uğurların əldə edildiyini və artıq dünya dövlətlərinin Xocalı faciəsini soyqırımı aktı kimi tanımağa başladığını diqqətə çatdırıb.
Mərasim iştirakçıları Xocalı faciəsi ilə bağlı fikirlərini bölüşərək ermənilərin təcavüzkar siyasətinin və insanlıq əleyhinə cinayətlərinin cəzasız qalmamalı olduğunu vurğulayıblar.
Tədbirdə, həmçinin Xocalı faciəsi haqqında film nümayiş etdirilib, iştirakçılara ölkəmiz və soyqırımı ilə bağlı təbliğat materialları təqdim edilib.
Tədbir Qətərin bir sıra aparıcı KİV-ində geniş işıqlandırılıb.
Bölmənin digər xəbərləri
