Donuz böyrəyi köçürülən ABŞ vətəndaşı iki ay sonra vəfat edib
Bakı, 13 may, AZƏRTAC
ABŞ-ın Boston şəhərindəki Massaçusets Xəstəxanasından bildiriblər ki, bu ilin əvvəlində geni dəyişdirilmiş donuzdan yeni böyrək transplantasiyası əməliyyatı keçirən ilk insan böyrək çatışmazlığından vəfat edib.
AZƏRTAC “Reuters” agentliyinə istinadla xəbər verir ki, xəstəxanadan verilən açıqlamada qeyd olunub: “Kütləvi transplantasiya qrupu donuz böyrəyi köçürülməsi əməliyyatının nəticəsini araşdırır”.
Massaçusets ştatının Ueymut şəhərindən olan 62 yaşlı Slayman dörd saat davam edən transplantasiya əməliyyatını mart ayında keçirib və həmin vaxt xəstəxana bunu ağır xəstələrin xilasında yeni mərhələ adlandırıb. ABŞ vətəndaşı yeddi il dializdə qaldıqdan sonra 2018-ci ildə eyni xəstəxanada ona insan böyrəyi köçürülüb, lakin beş ildən sonra həmin orqan uğursuz olub. Bunun ardından Slaymana geni dəyişdirilmiş donuz böyrəyi transplantasiya edilib.
Tədqiqatçılar keçən ilin oktyabrında “Nature” jurnalına bildiriblər ki, “eGenesis” tərəfindən yetişdirilən, eyni şəkildə geni dəyişdirilən donuz böyrəkləri orta hesabla 176 gün və bir halda iki ildən çox diri saxlanılan meymunlara uğurla köçürülüb.
Hazırda ABŞ-da 100 mindən çox insan transplantasiya üçün orqan gözləyir və böyrəklərə ən çox tələbat var.
Merilend Universitetinin cərrahlar qrupu 2022-ci ilin yanvarında geni dəyişdirilmiş donuz ürəyini ürək xəstəliyi olan 57 yaşlı kişiyə köçürüb, lakin o, iki ay sonra vəfat edib.
Bölmənin digər xəbərləri
