DÖVLƏT MUSİQİ MƏDƏNİYYƏTİ MUZEYİ XARİCİ ÖLKƏLƏRƏ SƏFƏRLƏRƏ HAZIRLAŞIR
Sentyabrın 8-16-da Peterburq Musiqi Alətləri Muzeyində “Muzeydəki musiqi alətləri səslənməlidirmi?” mövzusunda konfrans keçiriləcəkdir. YUNESKO-nun bölmələrindən biri olan Musiqi Alətləri və Kolleksiyaları Muzeyləri Beynəlxalq Komitəsi tərəfindən təşkil olunmuş konfransda Azərbaycan Musiqi Mədəniyyəti Muzeyinin direktoru Alla Bayramova da iştirak edəcəkdir. Konfransın proqramına onun geniş məruzə də daxil olunmuşdur.
Alla Bayramova AZƏRTAC-ın müxbiri ilə söhbətində demişdir ki, adı çəkilən Komitə hər il müxtəlif ölkələrdə forumlar, simpoziumlar və konfranslar keçirir. İndiki konfransda müzakirələrin əsas mövzusu belə bir tezisdən ibarət olacaq ki, muzeylərdəki musiqi alətləri, o cümlədən də nadir və qədim alətlər səslənməlidirmi? Məsələ bundadır ki, muzey ekspozisiyasındakı alətləri səsləndirmək, onların bənzərsiz səsini eşitmək istəyi həmin alətlərdə ifanı qadağan edən muzey təlimatlarının tələbləri ilə çox vaxt ziddiyyət təşkil edir. Alla Bayramovanın dediyi kimi, onun məruzəsinin mövzusu da məhz bu iki cəhəti necə uyğunlaşdırmaq barədədir. Yeri gəlmişkən, o, Belçika, Niderland, Lüksemburq, Almaniya, Fransa, Danimarka, İsveç və Finlandiyadan olan mütəxəssis və ekspertlərin iştirak edəcəkləri konfransda MDB ölkələninin yeganə nümayəndəsidir.
Muzeyin direktoru sentyabrın 17-24-də keçiriləcək digər bir festival haqqında da danışmışdır. Həmin festival 10-cu ildir keçirilir və bu dəfə tədbirdə sənətşünaslıq namizədi, Bakı Musiqi Akademiyasının musiqi alətləri elmi tədqiqat laboratoriyasının rəhbəri Məcnun Kərimovun başçılığı ilə muzeyin nəzdindəki qədim musiqi alətləri ansamblı da çıxış edəcəkdir. 1996-cı ildə Azərbaycan Prezidenti Heydər Əliyev bu ansambla dövlət statusu vermişdir. O, dünyada nadir ansambllardan biridir. Ansamblın musiqiçiləri muzeyə məxsus olan və Məcnun Kərimov, onun köməkçiləri tərəfindən böyük zəhmətlə bərpa edilən doqquz qədim Azərbaycan musiqi alətində (çəng, çəqane, santur, rübab, rüd, bərbət, Şirvan təmburu, qopuz, çoğur) çalırlar. Dünyada elə bir muzey yoxdur ki, orada muzey ekspozisiyalarında olan qədim alətlərdə çalan ansambl fəaliyyət göstərsin.
Həmyerlilərimiz Strasburqda və Selestdəki qədim Sent-Fua kilsəsinin binasında konsertlər verəcəklər.
Alla Bayramova demişdir ki, festivalda çıxış etməyə imkan yaradıldığına görə, YUNESKO-ya minnətdarlıq əlaməti olaraq bu təşkilatın Parisdəki binasında pulsuz konsert verməyi də planlaşdırırıq.
Hazırda YUNESKO-nun mədəni irs şöbəsi muzeyə ansamblın kompakt diskini buraxmaqda kömək edir. Muzeyin əməkdaşları Azərbaycan musiqi alətlərinin təbliği sahəsinədə səmərəli iş görürlər. Məsələn, muzeyin kollektivi xalq musiqi alətlərinin kataloqunu buraxan Tokio və Brüssel muzeylərinə izahatlar, məktublar göndədərək, Azərbaycana aid informasiyanı dəqiqləşdirməyi xahiş etmişdir. Çünki onların kataloqlarında bəzi Azərbaycan musiqi alətlərinin etnik və coğrafi mənsubiyyəti göstərilməmişdi. Əcnəbi həmkarlar bu izahatlara görə bakılılara təşəkkürünü bildirmiş və növbəti kataloqda düzəliş edəcəklərinə söz vermişlər.
Bölmənin digər xəbərləri
