“Dövlət satınalmaları haqqında” Qanunun tətbiqi sahibkarların dövlət satınalmalarında iştirakını asanlaşdıracaq
Bakı, 4 noyabr, AZƏRTAC
“Dövlət satınalmaları haqqında" Qanunun tətbiqi ilə bağlı keçirilən seminarların təşkili həm satınalan təşkilatların, həm də sahibkarların dövlət satınalmalarında iştirakını asanlaşdıracaq, eyni zamanda, sağlam rəqabət mühitinin təmin olunmasına öz töhfəsini verəcək.
Bu barədə AZƏRTAC-a Antiinhisar və İstehlak Bazarına Nəzarət Dövlət Xidmətinin Dövlət satınalmalarına nəzarət şöbəsinin müdiri Əhməd Həsənov deyib.
Şöbə müdiri qeyd edib ki, “Dövlət satınalmaları haqqında” Qanundan irəli gələrək məxfi satınalmalar istisna olmaqla bütün dövlət satınalmaları elektronlaşır və “etender.gov.az” portalı ilə həyata keçirilir. Sahibkarların və satınalan təşkilatların elektronlaşmaya hazır olmaları məqsədilə Antiinhisar və İstehlak Bazarına Nəzarət Dövlət Xidməti tərəfindən təlimlər, seminarlar təşkil olunur.
“Düşünürəm ki, gələn il yanvarın 1-dək bir çox dövlət qurumları və sahibkarlara praktiki təlimlər keçməklə onları qanunun tətbiqinə hazırlayacağıq”, - deyə Əhməd Həsənov qeyd edib.
Bölmənin digər xəbərləri
