İQTİSADİYYAT
Dövlət Sığorta Kommersiya Şirkətinin yeni sədri kollektivə təqdim edilib
Bakı, 9 dekabr, AZƏRTAC
Azərbaycan Respublikası Prezidentinin köməkçisi - Azərbaycan Respublikası Prezidentinin Administrasiyasının İqtisadi siyasət və sənaye məsələləri şöbəsinin müdiri Natiq Əmirov Dövlət Sığorta Kommersiya Şirkətinin yeni təyin olunmuş sədri Fərhad Adıgözəlovu şirkətin kollektivinə təqdim edib.
Şirkətdən AZƏRTAC-a bildirilib ki, Natiq Əmirov qurumun əsas vəzifələrinin şirkətin tərkibinə daxil olan bölmələrin işini təşkil etməkdən, icbari, könüllü və təkrarsığorta fəaliyyətini həyata keçirməkdən, dövlət sığortası orqanlarının fəaliyyəti ilə əlaqədar məsələlər üzrə qanunvericilik aktlarının hazırlanmasında iştirak etməkdən ibarət olduğunu qeyd edib. Ötən müddət ərzində şirkətin 44 günlük Vətən müharibəsində şəhid olmuş hərbi qulluqçuların ailə üzvlərinə və xəsarət almış hərbi qulluqçulara 56 milyon manatdan çox sığorta ödənişi həyata keçirdiyini diqqətə çatdırıb. Natiq Əmirov bildirib ki, Dövlət Sığorta Kommersiya Şirkəti bütün respublika ərazisində fəaliyyət göstərir və 80 sığorta agentliyinə malikdir. Şirkət vətəndaşların, xüsusilə hərbi qulluqçuların dövlət icbari şəxsi sığortası istiqamətində faydalı və əhəmiyyətli işlər görüb.
Natiq Əmirov Prezident İlham Əliyevin və Birinci vitse-prezident Mehriban Əliyevanın Dövlət Sığorta Kommersiya Şirkətinin gələcək fəaliyyəti ilə bağlı tapşırıqlarını kollektivin diqqətinə çatdıraraq, qarşıya qoyulmuş hədəflərə nail olmaq üçün şirkətin kollektivinə məsləhət və tövsiyələrini verib. Dövlət Sığorta Kommersiya Şirkətinə ölkənin sığorta bazarında sığorta və təkrarsığorta fəaliyyəti istiqamətində görüləcək işlərdə müvəffəqiyyət arzulayıb.
Dövlət Sığorta Kommersiya Şirkətinin yeni təyin olunmuş sədri Fərhad Adıgözəlov Azərbaycan Respublikası Prezidentinin ona göstərdiyi yüksək etimada görə minnətdarlığını bildirib, qarşıya qoyulan vəzifələri layiqincə yerinə yetirmək üçün çalışacağını qeyd edib.
İclasda Azərbaycan İnvestisiya Holdinqinin icraçı direktoru Ruslan Əlixanov da iştirak edib. Ruslan Əlixanov öz növbəsində, Dövlət Sığorta Kommersiya Şirkətində (“Azərsığorta”) qabaqcıl təcrübə və müasir korporativ idarəetmə standartları tətbiq edilməklə şirkətin fəaliyyətinin təkmilləşdiriləcəyinə və səmərəliliyin artırılacağına əminliyini bildirib.
Xatırladaq ki, Azərbaycan Respublikası Prezidentinin 2021-ci il 22 sentyabr tarixli Sərəncamı ilə Dövlət Sığorta Kommersiya Şirkəti Azərbaycan İnvestisiya Holdinqinin idarəetməsinə verilib.