DÖVLƏT SOSİAL MÜDAFİƏ FONDUNDA GÖRÜŞ KEÇİRİLMİŞDİR

11.11.2006 [12:12]
Çap et
A⁺ A^-

AZƏRTAC xəbər verir ki, ölkəmizdə səfərdə olan Səudiyyə Ərəbistanı Krallığının Ali Sosial Sığorta Təşkilatının sədri Şeyx Soliman əl Humaydın başçılıq etdiyi nümayəndə heyətinin üzvləri noyabrın 10-da Dövlət Sosial Müdafiə Fondunda olmuşlar.

Fondun sədri Səlim Müslümov qonaqları salamlayaraq, Prezident İlham Əliyevlə Səudiyyə Ərəbistanı kralı Abdullah bin Əbdüləziz al Səud arasındakı dostluq münasibətlərindən danışmışdır. Bildirilmişdir ki, ölkə başçısının 2005-ci ilin avqustunda Səudiyyə Ərəbistanına səfəri dövlətlərimiz arasında hərtərəfli əlaqələrin genişləndirilməsində mühüm rol oynamışdır. S.Müslümov Səudiyyə Ərəbistanının sosial sığorta sahəsindəki təcrübəsindən bəhrələnmək məqsədi ilə ikitərəfli görüşlər keçirilməsinin əhəmiyyətini vurğulamışdır.

Seyx Soliman əl Humayd səmimi qəbula görə minnətdarlığını bildirərək demişdir ki, Azərbaycan rəhbərliyinin ölkəmizin müstəqillik qazandığı 15 il ərzində dövlətçiliyin, iqtisadiyyatın inkişafı yolunda, xalqımızın firavan yaşaması uğrunda böyük işlər gördüyündən xəbərdardır. O, Səudiyyə Ərəbistanında sosial sığorta sistemi sahəsində toplanmış təcrübəni azərbaycanlı həmkarlarla bölüşməyə hazır olduğunu bildirmişdir.

Qonaqlar səfər çərçivəsində bir sıra rəsmi görüşlər keçirəcək, bölgələrə gedəcək, fondun yerli qurumlarının işi ilə tanış olacaqlar.

Səfər noyabrın 18-də başa çatacaqdır.