Doxsan yaşlı məktəbin yubileyi qeyd olunub
Bakı, 1 fevral, AZƏRTAC
Bakı şəhəri 7 nömrəli tam orta məktəbin 90 illik yubileyinə həsr olunmuş tədbir keçirilib.
Müslüm Maqomayev adına Azərbaycan Dövlət Filarmoniyasında təşkil olunmuş tədbirdə dövlət və hökumət rəsmiləri, Milli Məclisin deputatları, Bakı Şəhəri üzrə Təhsil İdarəsinin (BŞTİ) müvafiq struktur bölmə rəhbərləri, ictimaiyyət nümayəndələri, məktəbin məzunları, müəllimlər, valideynlər və şagirdlər iştirak ediblər.
BŞTİ-dən AZƏRTAC-a bildirilib ki, “Uğurlu gələcəyin təməli” adlı tədbir Azərbaycan Respublikası dövlət himninin səsləndirilməsi ilə başlayıb.
Məktəbin direktoru Könül Həsənova qonaqlara təhsil müəssisəsinin 90 il ərzində keçdiyi inkişaf yolundan və qazandığı uğurlardan söhbət açıb. Direktor qeyd edib ki, 7 nömrəli tam orta məktəb 1928-ci ildə ibtidai-orta məktəb kimi fəaliyyətə başlayıb.
K.Həsənova məktəbin təcrübəli pedaqoji kollektivinin olduğunu, müəllimlərin səylə çalışdığını, şagirdlərin bilik, bacarıq və vərdişlərinin formalaşdırılmasında əvəzsiz xidmətlər göstərdiyini qeyd edib.
BŞTİ-nin müdir müavini Nərgiz Səfərova məktəb kollektivini 90 illik yubiley münasibətilə təbrik edib, onlara işlərində müvəffəqiyyətlər arzulayıb. N.Səfərova paytaxtın təhsil həyatında özünəməxsus ənənələri ilə fərqlənən məktəbin tədris nailiyyətlərinin son illərdə xüsusilə yaxşılaşdığını, məzunların ali məktəblərə qəbul göstəricilərinin xeyli yüksəldiyini söyləyib.
Tədbirdə çıxış edən Azərbaycan Respublikası Prezidentinin İşlər İdarəsinin Siyasi Sənədlər Arxivinin direktoru Elmira Ələkbərova, Milli Məclis Aparatının Sosial qanunvericilik şöbəsinin müdiri Adilə Abbasova, Təhsil İşçiləri Azad Həmkarlar İttifaqı Səbail rayon komitəsinin sədri Mükafat Abbasov, Əməkdar artist Gövhər Həsənzadə, məktəbin əvvəlki direktoru Bəhram Əliyev, Əməkdar artist Fərqanə Qasımova və başqaları paytaxtın ümumtəhsil müəssisələrində tətbiq olunan yeniliklərdən, təhsil sahəsində aparılan islahatlardan və perspektivdən bəhs ediblər. Prezident İlham Əliyevin təhsilə, təhsil işçilərinə göstərdiyi diqqət və qayğının nəticə etibarilə bu sahənin sürətli inkişafı, maddi-texniki bazasının daha da möhkəmlənməsi ilə nəticələndiyi vurğulanıb.
Tədbirdə 7 nömrəli tam orta məktəbin məzunu olmuş Milli Məclisin sədri Oktay Əsədovun 90 illik yubileylə əlaqədar məktəbə ünvanladığı təbrik məktubu oxunub.
Yubiley tədbirində şagirdlər vətənpərvərlik, təhsil və məktəb həyatından bəhs edən müxtəlif şeirlər söyləyib, mahnılar oxuyub, ədəbi-bədii kompozisiyalar nümayiş etdiriblər.
Tədbirdə məktəbin 90 illik tarixini özündə təcəssüm etdirən qısa filmlər, təbriklərdən ibarət videoçarxlar nümayiş olunub.
Daha sonra illər öncə məktəbi bitirən məzunlara, məktəbin pedaqoji kollektivinin üzvlərinə və fəal şagirdlərə səmərəli fəaliyyətlərinə görə məktəb rəhbərliyi adından təşəkkürnamə və mükafatlar təqdim olunub.
Sonda qonaqlar xatirə kitabına ürək sözlərini qeyd ediblər.
Bölmənin digər xəbərləri
