DÜNYA
DÜBƏNDİ TERMİNALI MODERNLƏŞDİRİLİR
“Azərsun” şirkəti cari ilin əvvəlindən bəri Dübəndi terminalının modernləşdirilməsinə təxminən 3 milyon dollar sərmayə qoymuşdur. Şirkətdən AZƏRTAC-ın müxbirinə bildirmişlər ki, bu, həmin terminaldan neft daşınmasının həcmini ayda 350 min tonadək artırmağa imkan verəcəkdir. Xatırladaq ki, hazırda o, ayda 200 min ton neft və neft məhsulları nəql etmək imkanına malıkdir.
Dübəndi terminalındakı köhnəlmiş infrastruktur şirkətə 1996-2001-ci illərdə Qazaxıstan neftini Azərbaycan Respublikası və Gürcüstan əraziləri vasitəsilə nəql etmiş “Kaspian Trans LTD” firmasından miras qalmışdır.
İndiyədək şirkət hər birinin uzunluğu 10 kilometr olan iki boru kəməri çəkmişdir və hərəsinin uzunluğu 15 kilometr olan daha üç kəmərin inşasını davam etdirir.
Neft daşınmalarının həcmini artırmaq məqsədi ilə terminalın çən parkını iki dəfə genişləndirilərək 240 min tona çatdırılmışdır. Şirkətin mütəxəssislərinin fikrincə, 4 min sisterndən ibarət sistern parkını da genişləndirmək lazımdır. Şirkətin ehtiyaclarını tam həcmdə ödəmək üçün isə daha bir min sistern tələb olunur.
Dübəndi terminalının gündəlik buraxıcılıq gücü 7-10 min tondur. Lakin 2003-cü ildən şirkət bunu 15 min tonadək çatdırmaq niyyətindədir. Qazanxana mazutunun ixracı da şirkətin fəaliyyət dairəsinə daxildir. 2002-ci ilin əvvəlindən 1 milyon tona yaxın qazanxana mazutu ixrac edilmişdir. Ümumilikdə isə, cari ilin 7 ayı ərzində “Azərsun” 903 min ton neft və neft məhsulları daşımışdır. Şirkət ilin sonunadək Dübəndi terminalına daha 7 milyon dollar sərmayə qoymağı planlaşdırır.