DÜNYA AZƏRBAYCANLILARININ HƏMRƏYLİK GÜNÜ HƏMVƏTƏNLƏRİMİZİN YIĞCAM YAŞADIQLARI BÜTÜN LKƏLƏRDƏ QEYD EDİLƏCƏKDİR
Xarici Ölkələrdə Yaşayan Azərbaycanlılarla İş üzrə Dövlət Komitəsi 31 dekabr Dünya azərbaycanlılarının həmrəylik gününə həsr edilmiş bir sıra tədbirlər keçirmək niyyətindədir.
Komitənin mətbuat xidmətindən AZƏRTAC-a bildirmişlər ki, bu tədbirlər həm ölkəmizdə, həm də həmvətənlərimizin yığcam yaşadıqları dövlətlərdə keçiriləcəkdir. Dövlət televiziyası ilə birlikdə Komitə “Vətən eşqiylə” mövzusunda silsilə verilişlər hazırlayacaq, respublikanın ali məktəblərində bir sıra tədbirlər keçiriləcək, Rəssamlar İttifaqı ilə birlikdə gənc rəssamların bu bayrama həsr edilmiş əsərlərindən ibarət sərgi təşkil olunacaqdır. Milli Elmlər Akademiyasının Tarix İnstitutu ilə birgə “Azərbaycan diasporunun görkəmli nümayəndələri” kitabı nəşrə hazırlanır. İlin sonunadək komitənin İnternet saytını açmaq da nəzərdə tutulur.
Bayram ərəfəsində komitə Rusiya Federasiyasında yaşayan azərbaycanlı gənclərin və tələbələrin bu ölkədə forumunu keçirmək fikrindədir. Moskvada diasporumuzun görkəmli nümayəndəsi Kərim Kərimovun 85 illik yubileyi də qeyd ediləcəkdir.
Dünya azərbaycanlılarının həmrəylik günü ABŞ, İsveçrə, Latviya, Litva, Estoniya, Özbəkistan, Ukrayna və Belarusda da qeyd ediləcək və bayram şənliklərinə bu dövlətlərin hökumət nümayəndələri də dəvət olunacaqlar.
Bölmənin digər xəbərləri
