DÜNYA BANKI AZƏRBAYCANIN MÜHASİBAT VƏ AUDİT SAHƏSİNƏ DAİR HESABAT HAZIRLAMIŞDIR
Maliyyə Nazirliyinin uçot siyasəti şöbəsinin müdiri Elxan Cəfərov bildirmişdir ki, Azərbaycan hökuməti ölkənin maliyyə uçotu və auditi ilə bağlı islahatlar aparır, iqtisadiyyatın ayrı-ayrı sahələrində gəlirlərdən istifadə olunmasında şəffaflığın təmin edilməsi üçün mühüm tədbirlər görür. Qeyri-neft sektorunun daha da inkişaf etdirilməsi, bu sahəyə sərmayələrin cəlb olunması üçün dəqiq maliyyə uçotu və audit çox vacibdir. Amma bu gün özəl sektorda, təhsil və digər sahələrdə bir sıra problemlər də yaşanmaqdadır. Nazirlik bu problemlərin həllində beynəlxalq təcrübənin öyrənilməsini vacib sayaraq Dünya Bankı ilə birgə Standart və Normalara Əməl Olunma Hesabatlarının (SNƏH) hazırlanmasında yaxından iştirak etmişdir.
Bankın Azərbaycan üzrə meneceri Qreqori Gedjeyçak demişdir ki, hesabatın hazırlanmasından məqsəd ölkənin mühasibat və audit sahəsindəki qaydalarını və faktiki təcrübəsini beynəlxalq standartlara və təcrübəyə əsasən qiymətləndirmək, mövcud boşluqları, uyğunsuzluqları aşkar etmək və onların aradan qaldırılmasına, möhkəm korporativ maliyyə hesabatı mühitinin yaradılmasına yardım göstərməkdir. Bankın əməkdaşları bu hesabatı hazırlayarkən Maliyyə Nazirliyi və digər əsas tərəfdaşlarla yaxından əməkdaşlıq etmişdir.
Sonra Dünya Bankının Avropa və Mərkəzi Asiya regionu üzrə maliyyə menecmenti şöbəsinin rəhbəri Con Heqarti, baş mütəxəssis Conotan Huper çıxış edərək hesabatın hazırlanması mexanizmi, onun əsas üstünlükləri və şərtləri, eləcə də perspektivli işlər barədə ətraflı məlumat vermişlər.
Dünya Bankının mütəxəssisləri bir fikri xüsusi vurğulamışlar ki, Azərbaycan bəzi ölkələrdən fərqli olaraq Bankın iştirakını gözləmədən maliyyə və audit barədə hesabat hazırlamağa başlamışdır. Bu da ölkədə düzgün maliyyə, bank siyasətinin həyata keçirildiyinin göstəricisidir.
Sonra hesabat ətrafında müzakirələr olmuş, Dünya Bankının, Azərbaycanın müxtəlif maliyyə, audit və bank qurumlarının mütəxəssisləri sənədlə bağlı rəy və təkliflərini bildirmişlər.
Dünya Bankının əməkdaşları müzakirələrdən razı qalmış və təkliflərin gələcəkdə nəzərə alınacağını qeyd etmişlər.
Bölmənin digər xəbərləri
