DÜNYA BANKININ YOL VƏ SU TƏSƏRRÜFATI İLƏ BAĞLI İKİ MİSSİYASI AZƏRBAYCANA GƏLƏCƏK

10.07.2006 [10:33]
Çap et
A⁺ A^-

AZƏRTAC xəbər verir ki, iyulun 11-də Dünya Bankının 2 missiyası ölkəmizdə səfərdə olacaq. Bankın Azərbaycan nümayəndəliyindən verilən məlumata görə, iyulun 20-dək davam edəcək səfərdən məqsəd bankın krediti hesabına çəkilən yolların tikintisi ilə bağlı görülən işlərə nəzər salmaqdır.

Bank hazırda Azərbaycanda yolların qurulması ilə bağlı 2 layihə həyata keçirir. Bunlardan biri tikintisinə 2000-ci ildə başlanmış Gəncə-Qazax yoludur. Həmin yolun tikintisinə 40 milyon ABŞ dolları vəsait ayrılmışdır və layihə yaxın zamanlarda başa çatacaqdır. Digər layihə Ələt-Astara, Bakı-Şamaxı yolunun tikintisi ilə bağlıdır. Bu layihənin icrasına cari ildən başlanmışdır. Dünya Bankı həmin yolun tikintisinə 200 milyon dollar vəsait ayırmışdır.

İyulun 11-dən 14-dək Bakıda olacaq ikinci missiyanın məqsədi isə ölkəmizdə su təsərrüfatının və kanalizasiya sisteminin vəziyyəti ilə tanış olmaqdır.