İDMAN
Dünya çempionu: Azərbaycana qızıl medalla qayıdacağıma inanırdım
![Dünya çempionu: Azərbaycana qızıl medalla qayıdacağıma inanırdım](/files/2024/2/1200x630/1716969957507138926_1200x630.jpg)
Bakı, 29 may, AZƏRTAC
“Azərbaycana qızıl medalla qayıdacağıma inanırdım”.
Bu sözləri AZƏRTAC-a açıqlamasında Yaponiyanın Kobe şəhərində təşkil olunmuş dünya çempionatında qızıl medal əldə edən Azərbaycan paraatleti Orxan Aslanov deyib.
O, nəticəyə görə xoşbəxt olduğunu bildirib: “Komanda şəklində Vətənə 4 medalla qayıtmaq qürurverici hissdir. Əlbəttə ki, bunu dünya çempionatı kimi nüfuzlu yarışda bacaranda emosiyalar tam fərqli olur. Əziyyətimizin bəhrəsini gördük. Bizi dəstəkləyən hər kəsə təşəkkür edirəm”.
“Paris-2024” Yay Olimpiya Oyunlarında iştirak edəcək idmançı medal şanslarını dəyərləndirib: “Hər zaman daha yüksək nəticə qazanmaq hədəfi ilə yola çıxıram. Əlimdən gələni edəcəyəm ki, Fransa paytaxtında da Azərbaycanı layiqincə təmsil edim”.
Xatırladaq ki, Azərbaycan paraatletlərindən Lamiyə Vəliyeva (T13) 100 və 400 metr məsafəyə qaçışda, Orxan Aslanov (T13) və Səid Nəcəfzadə (T12) isə uzunluğa tullanma üzrə yarışda qızıl medal qazanıblar. Yarışı ümumilikdə 4 qızıl mükafatla başa vuran yığma ilk dəfə mundialda medal əyarına görə belə nəticə göstərib. Bu qələbəyədək ən yaxşı göstərici 2011-ci ildə Yeni Zelandiyada keçirilmiş dünya çempionatında (3 qızıl, 1 gümüş və 2 bürünc medal) qeydə alınıb.