DÜNYA
DÜNYADA ƏN SƏRFƏLİ MOTOSİKLET
Yaponiyanin “Yamaha Motor” şirkəti elektrik və benzin mühərrikləri ilə təchiz olunmuş dünyada ilk və ən qənaətcil hibrid motosikletin prototipinin yaradıldığını elan etmişdir. Bu kombinasiya bir litr benzinlə 250 kilometr yol qət etməyə imkan verir. Yaponiyanın “Honda” şirkətinin istehsal etdiyi və bugünədək ən qənaətcil hesab edilən adi “Super-kab-50 Kastom” motosikleti bu qədər yanacaqla ancaq 146 kilometr yol gedə bilir.
İTAR-TASS-ın verdiyi xəbərə görə, “Yamaha motor” şirkətinin buraxdığı motosiklet uzunluğu 185, hündürlüyü isə 113 santimetr olan velosipedi xatırladır. Onun elektrik mühərriki pedallar olan hissədə yerləşir və start üçün istifadə olunur. Motosikletin sürəti saatda 5 kilometrə çatanda, oturacağın altında gizlədilmiş kiçik benzin mühərriki işə düşür. Hərəkət prosesində elektrik motorunun akkumulyatoru öz-özünə dolur. Bu mühərrikdən istifadə edilməsi nəticəsində ətraf mühit daha az çirklənir.
1990-cı illərin axırlarından Yaponiyada benzin-elektrik avtomobilləri də buraxılır və ölkədə getdikcə daha geniş yayılır. “Toyota” şirkətinin buraxdığı və daha populyar olan “Prius” avtomobili dünyada ən qənaətcil minik maşını hesab edilir.