Dünyada vurulan COVID vaksinlərinin miqdarı 3 milyard 440 milyon dozanı ötüb
Bakı, 12 iyul, AZƏRTAC
İyulun 12-dək dünya üzrə koronavirusa qarşı vurulan peyvənd dozalarının sayı 3 milyard 440 milyonu ötüb.
AZƏRTAC vaksinasiyanın statistikasını aparan "Ourworldindata.org" saytına istinadla xəbər verir ki, hazırda Çin 1 milyard 380 milyon doza ilə dünya ölkələri arasında liderdir. Bu göstərici üzrə ikinci və üçüncü yerləri tutan Hindistanda 377 milyon 352 min, ABŞ-da 334 milyon 150 min doza peyvənd vurulub.
Vurulan vaksin dozalarının sayına görə ilk onluqda, həmçinin Braziliya (114 milyon 460 min), Almaniya (81 milyon 940 min), İngiltərə (80 milyon 650 min), Yaponiya (60 milyon 260 min), Fransa (59 milyon 120 min), Türkiyə (58 milyon 285 min) və İtaliya (57 milyon 620 min) yer alıb.
Əhalinin hər 100 nəfərinə düşən peyvənd dozalarının miqdarına görə isə birinci yerdə Birləşmiş Ərəb Əmirlikləri gedir (161,11 doza). Bu göstərici üzrə ilk beşlikdə, həmçinin Malta (159,86), Seyşel Adaları (141,98), İslandiya (132,44) və San-Marino (131,59) qərarlaşıb.
İndiyədək ümumilikdə dünyanın 18 ölkəsində əhali sayından çox vaksin dozası vurulub.
Bölmənin digər xəbərləri
