ƏDLİYYƏ NAZİRLİYİNİN MƏLUMATI
Mətbuatda xəbər verildiyi kimi, Azərbaycan Xalq Cəbhəsi Partiyasının qurultayında qəbul olunmuş qərarlar Azərbaycan Respublikası Ədliyyə Nazirliyinin kollegiyası tərəfindən qanunauyğun hesab edilmişdir.
Nazirliyin həmin qərarı ilə bağlı mətbuatda müxtəlif, o cümlədən həqiqətə uyğun olmayan şərhlərin yayılması ilə əlaqədar Ədliyyə Nazirliyi bu barədə əlavə məlumat verməyi zəruri hesab edir.
2000-ci ildə AXCP-nin “islahatçılar” və “klassiklər” adlanan tərəflərinin partiyada rəhbərliyi ələ keçirmək zəminində münaqişəsi başlamış və bu, partiya daxilində parçalanma ilə nəticələnmişdir. Beləliklə, bir-birlərini qarşılıqlı inkar edərək, özünü Azərbaycan Xalq Cəbhəsi Partiyası kimi təqdim edən və bütün səviyyələrdə bir-birinə alternativ idarəetmə orqanlarına malik iki müxtəlif qruplaşma yaranmışdır.
Hər iki tərəf bir-birini nizamnaməyə və qanunlara əməl etməməkdə təqsirli bilərək, əks tərəfi təmsil edən rəhbərlərin və özləri üçün arzuolunmaz hesab etdikləri digər üzvlərin partiya sıralarından xaric edilməsi haqqında qərarlar qəbul etmiş, digər tərəfin qeyri-legitim olduğunu sübut etməyə çalışmış və bu barədə Ədliyyə Nazirliyinə rəsmi müraciətlər edərək, mövqelərini əsaslandırmağa cəhd göstərmişlər. AXCP-nin ayrı-ayrı rəhbərləri tərəfindən siyasi partiyalarda birləşməyin əsas prinsiplərindən biri kimi, qanunvericilikdə müəyyən edilmiş “ümumi siyasi ideyalar və məqsədlər” kənara atılaraq, şəxsi ambisiyalar və qrup maraqları əsas götürülmüşdür.
“Siyasi partiyalar haqqında” Qanunun və partiya nizamnaməsinin AXCP daxilində kobud pozulması ilə müşayiət olunan bu proseslər cəmiyyətdə də birmənalı qarşılanmamış, müxtəlif siyasi qurumlar tərəfindən AXCP adı altında ya “islahatçılar”, yaxud “klassiklər”dən biri tanınaraq, digəri inkar edilmişdir. AXCP daxilində yaranmış belə anormal vəziyyətin aradan qaldırılması üçün sonrakı müddətdə partiyanın bəzi yüksək ranqlı rəhbərləri bir çox səylər göstərmiş, hər iki tərəfdən olan partiya rəhbərlərinin də daxil olduğu barışıq komissiyası yaradılmış, komissiya tərəfindən birləşdirici qurultaya hazırlıq üzrə Təşkilat komitəsi formalaşdırılmışdır.
Sonradan sədrlik məsələsində yaranmış fikir ayrılığına görə, tərəflərin bəzi funksionerləri danışıqlardan imtina etsələr də, partiya quruculuğunda fəal iştirak etmiş şəxslərin yaratdığı Təşkilat komitəsi öz işini davam etdirərək partiyanın rəhbər orqanlarına yeni, demokratik əsaslarla seçkilər keçirilməsini təklif etmişdir.
Bu təşəbbüs rayon təşkilatları tərəfindən də dəstəklənmiş, 54 rayonda həm “klassiklərin”, həm də “islahatçıların” birgə konfransları keçirilərək, qurultaya nümayəndələr seçilmişdir.
Qurultayda 68 rayon şöbəsini təmsil edən 430 nümayəndədən 419 nəfəri iştirak etmiş, hər iki tərəfdən mərkəzi nəzarət-təftiş komissiyası seçilmiş, yeni redaksiyada nizamnamə qəbul olunaraq, bu barədə Ədliyyə Nazirliyinə müraciət edilmişdir.
Partiyanın ali orqanları təşkilatda əvvəllər rəhbər vəzifə tutan şəxslərdən formalaşmış, o cümlədən partiyanın “klassiklər” tərəfinin mərkəzi nəzarət-təftiş komissiyasının üzvləri əksər tərkibdə (7 nəfərdən ibarət heyət) birləşmə prosesinə qoşulmuşdur.
Ədliyyə Nazirliyi qurultayın təqdim etdiyi sənədləri öyrənmiş, habelə əlavə sənədlər tələb edərək ətraflı araşdırmalar aparmış, qurultayın “Siyasi partiyalar haqqında” Azərbaycan Respublikası Qanununun 14-cü maddəsinin tələblərinə, partiya nizamnaməsinə uyğun keçirildiyini müəyyən etmiş və AXCP-nin 1995-ci ildə dövlət qeydiyyatına alınmış sənədlərinə müvafiq dəyişikliklər etmişdir.
Beləliklə, Ədliyyə Nazirliyi mətbuatda bu haqda verilən bəyanatlara cavab olaraq bir daha bildirir ki, nazirliyin Kollegiyası heç bir partiyanın qeydiyyatını ləğv etməmiş, heç bir qurumun fəaliyyətinə qadağa qoymamışdır. Hər bir partiya və yaxud qurum yuxarıda istinad olunan qanuna müvafiq öz toplantısını keçirərək, qeydiyyat üçün Ədliyyə Nazirliyinə müraciət edə bilər.
Bölmənin digər xəbərləri
