Egey dənizində baş verən seysmik aktivliklə bağlı açıqlama verilib
İstanbul, 3 fevral, Günel Karatepe, AZƏRTAC
Son bir saat ərzində Egey dənizində şiddəti 4 baldan yuxarı 6 zəlzələ qeydə alınıb.
AZƏRTAC xəbər verir ki, yeraltı təkanlarla bağlı Türkiyənin Fövqəladə Halların İdarə Olunması Agentliyi (AFAD) məlumat yayıb.
Bildirilib ki, yeraltı təkanların ocağı dənizin 7 kilometr dərinliyindədir.
Son 48 saat ərzində Egey dənizinin Santorini və Kiklad adaları bölgəsində ən böyüyü 4,8 bal gücündə olmaqla 400-dən çox sarsıntı qeydə alınıb. Yunanıstanın Baş naziri Kiriakos Mitsotakis artan seysmik hərəkətliliklə bağlı təcili toplantı qərarı alıb.
Yeraltı təkanlar əsasən, yanvarın 28-dən etibarən Yunanıstanın Santorini adası və ətrafında qeydə alınıb. Vulkanik ada olan Santorinidə son günlərdə bir neçə vulkan aktivləşməsi də müşahidə edilir. Lakin, zəlzələlərin Santorinidəki yanar dağla əlaqəsinin olmadığı bildirilib.
AFAD-ın açıqlamasına görə, son bir neçə gün ərzində Türkiyə sahillərinə ən yaxın zəlzələ 140 kilometr məsafədə baş verib.
Təkanların Santorini adasının təxminən 25 kilometr şimal-şərqində meydana gəldiyi və dərinliklərinin 5 ilə 25 kilometr arasında dəyişdiyi bildirilir.
Qeyd edilib ki, 2011-2012-ci illərində də eyni bölgədə oxşar seysmik aktivlik baş verib. 14 ay davam edən zəlzələlər heç bir vulkan hərəkətliliyinə səbəb olmayıb.
Bölmənin digər xəbərləri
