Bakı, 25 sentyabr (AZƏRTAC). Azərbaycan vətəndaşlarına, hüquqi və fiziki şəxslərə, dövlət qulluqçularına “elektron imza” sertifikatlarını vermək üçün Məlumat Hesablama Mərkəzi (MHM) “Azərpoçt” MMC ilə birlikdə ilk olaraq Bakıda yerləşən 1-6 nömrəli mərkəzi poçt filiallarında qeydiyyat mərkəzlərini təşkil edir. Bununla bağlı lazımi avadanlıq quraşdırılır.

Rabitə və İnformasiya Texnologiyaları Nazirliyindən AZƏRTAC-a bildirmişlər ki, vətəndaşlara yüksək səviyyədə və operativ xidmət göstərməl məqsədi ilə MHM tərəfindən “Azərpoçt” MMC-nin mütəxəssisləri üçün treninqlər keçirilir. Treninq iştirakçılarına təlim materialları (videomaterial) və tədris vəsaitləri (QM operatorları üçün hazırlanmış təlimatlar, vətəndaşlardan tələb olunan və onlara verilən sənədlərin nümunələri və s.) təqdim edilir.

Qeydiyyat mərkəzlərinə müraciət edən hər bir vətəndaş “Elektron imza və elektron sənəd haqqında” Azərbaycan Respublikası Qanununa uyğun olaraq şəxsiyyət vəsiqəsini, hüquqi şəxs və ya dövlət qulluqçusu olduqda qanunvericiliyə müvafiq digər sənədləri (hüquqi və fiziki şəxs, həmçinin sahibkarlar üçün nəzərdə tutulmuş etibarnamə, “e- imza” sertifikatının alınmasına müraciət olunan işçilərin siyahısı, təşkilatın nizamnaməsi, dövlət qeydiyyatından keçməsi haqqında şəhadətnamə, dövlət reyestrindən çıxarış, vergi ödəyicisinin qeydiyyatı haqqında bildiriş və digər qeydiyyat sənədlərini) təqdim edir. Sənədlər qeydiyyat mərkəzi operatorları tərəfindən diqqətlə yoxlanıldıqdan və xidmət haqqı ödənildikdən sonra hər bir vətəndaşın adına ərizə formalaşdırılır.

Ərizəyə daxil edilən şəxsi məlumatlar İAMAS (Daxili İşlər Nazirliyinin bazası) ilə yoxlandıqdan və təsdiq edildikdən sonra məhsulun emalı prosesinə başlanılır.

Tam məhsul paketləri (vətəndaşa aid olan smart kart, pin kod zərfi, kağız daşıyıcıda olan 2 nüsxə sertifikat, 2 nüsxə müqavilə) hazır olduqda dəstlənərək müvafiq qeydiyyat mərkəzlərinə çatdırılır və vətəndaşlara qanunvericilikdə nəzərdə tutulmuş qaydada təqdim edilir. Bundan əlavə “www.e-imza.az” saytı da vətəndaşların istifadəsinə verilmişdir. Bu sayt imza sahiblərinin fərdi məlumatları əsasında axtarış aparmağa, sertifikatları yoxlamağa, “e-imzalayıcı” proqramını yükləməyə və eyni zamanda “e-imza” ilə bağlı onları maraqlandıran suallara cavab tapmaq imkanı verir.

Qeyd edək ki, regionlarda da qeydiyyat mərkəzlərinin təşkili istiqamətində işlər aparılır.