Qlobal istiləşmə Avropada ekstremal hava şəraitini gücləndirir
Stokholm, 28 may, AZƏRTAC
Ümumdünya Meteorologiya Təşkilatı (ÜMT) xəbərdarlıq edir ki, növbəti beş il müşahidələr tarixində ən isti dövr ola bilər. Təşkilatın proqnozlarına görə, bu dövrdə orta qlobal temperaturun sənayeləşmədən əvvəlki səviyyələrdən 1,9 dərəcəyə qədər yüksək olması proqnozlaşdırılır.
AZƏRTAC xəbər verir ki, alimlər bunu həm qlobal iqlim dəyişikliyi, həm də istiləşməni daha da gücləndirən təbii El Nino fenomeni ilə əlaqələndirirlər. ÜMT-nin məlumatına görə, hazırkı El Ninoun pik zirvəsi 2027-2028-ci illərdə gözlənilir.
Avropa artıq anomal istilər yaşayıb. May ayında Böyük Britaniyada temperatur 35 dərəcə Selsi, İrlandiyada 28,6 dərəcə Selsi və istidən yeddi nəfərin öldüyü Fransada 39 dərəcə Selsiyə çatıb.
İsveçli mütəxəssislər xəbərdarlıq edirlər ki, ölkə yeni temperatur rekordları və getdikcə daha tez-tez baş verən ekstremal hava hadisələri ilə üzləşmək riski ilə də qarşı-qarşıyadır.
Stokholm Universitetinin professoru Mikael Çyörnströmə görə, iqlimin istiləşməsi fonunda istilik dalğaları, güclü yağışlar və fırtınalar ehtimalı artmağa davam edəcək: “Bəşəriyyət iqlim dəyişikliyi ilə mübarizə aparmaq üçün kifayət qədər iş görmədikcə, bu proseslər davam edəcək”.
Bölmənin digər xəbərləri
