Bişkekdə 28 May – Müstəqillik Gününə həsr olunmuş qəbul təşkil edilib
Bakı, 28 may, AZƏRTAC
Azərbaycanın Qırğızıstandakı səfirliyi tərəfindən Bişkek şəhərində 28 May – Müstəqillik Gününə həsr olunmuş rəsmi qəbul təşkil edilib.
AZƏRTAC xəbər verir ki, ziyafətdə Qırğızıstanın hökumət və siyasi-ictimai dairələrinin təmsilçiləri, bu ölkədə akkreditə olunmuş diplomatik nümayəndəliklərin rəhbərləri və diplomatik heyət üzvləri, Azərbaycan, Türk diasporunun, yerli ictimaiyyətin və media nümayəndələri iştirak ediblər.
Qəbulda səfir Lətif Qəndilov çıxış edərək bildirib ki, bu gün Azərbaycan xalqı və Azərbaycan dövləti üçün xüsusi tarixi əhəmiyyət daşıyır. 1918-ci ildə Azərbaycan xalqı Şərqdə ilk olaraq müstəqillik bayrağını ucaltdı və Şərqdə ilk demokratik respublika — Azərbaycan Xalq Cümhuriyyətini yaratdı: “Bu, təkcə ölkəmizin deyil, bütün regionun tarixində mühüm bir mərhələ oldu. Hələ o dövrdə Azərbaycan bütün vətəndaşlarına bərabər hüquq və azadlıqlar, o cümlədən qadınlara seçki hüququ təmin etmişdi ki, bu da öz dövrü üçün olduqca mütərəqqi addım idi”.
O, müasir Azərbaycanın müstəqilliyinin qorunub saxlanmasının və möhkəmləndirilməsinin xalqımızın Ümummilli Lideri Heydər Əliyevin adı ilə bağlı olduğunu və Heydər Əliyev tərəfindən təməli qoyulan inkişaf strategiyasının Prezident İlham Əliyev tərəfindən inamla davam etdirildiyini bildirərək, ötən müddət ərzində ölkəmizin böyük inkişaf yolu keçdiyini, müasir güclü və nüfuzlu dövlətlərdən birinə çevrildiyini söyləyib.
Sonra L.Qəndilov bildirib ki, Cənubi Qafqazda sülh və sabitliyin təmin olunması Azərbaycan üçün əsas prioritetlərdən biridir. O, 2020-ci ildə ikinci Qarabağ müharibəsi başa çatdıqdan dərhal sonra ölkəmizin sülh təşəbbüsü ilə çıxış etdiyini vurğulayıb, 2025-ci ildə Vaşinqtonda Azərbaycan ilə Ermənistan arasında sülh sazişinin mətninin paraflandığını söyləyib.
Səfir Azərbaycanın birtərəfli qaydada Ermənistana malların tranziti üzərində olan məhdudiyyətləri aradan qaldırdığını, indiyədək Azərbaycan dəmir yolu vasitəsilə Ermənistana 30 min ton həcmində yükün ötürüldüyünü, həmçinin Azərbaycanın Ermənistana 15 min ton həcmində nefti və neft məhsullarının tədarük edildiyini bildirib.
Daha sonra səfir işğaldan azad olunmuş Azərbaycan ərazilərində mina təhlükəsinə dair məlumat verərək qeyd edib ki, Ermənistanın işğalı nəticəsində Azərbaycan dünyada ən çox mina ilə çirkləndirilmiş ölkələr sırasındadır.
Diplomat Azərbaycanın son illərdə sosial-iqtisadi inkişaf sahəsində mühüm nailiyyətlər əldə etdiyini və beynəlxalq arenada mövqelərini daha da möhkəmləndirdiyini bildirərək, Şərqlə Qərbin kəsişməsində yerləşən ölkəmizin Avrasiyada mühüm enerji və nəqliyyat mərkəzlərindən birinə çevrildiyini deyib.
Qırğızıstanla ikitərəfli iqtisadi əlaqələrə toxunan L.Qəndilov vurğulayıb ki, ölkələrimiz arasında ali dövlət səfərləri həyata keçirilir və bu ildə də səfərlərin davam etdirilməsi planlaşdırılır.
Səfir ölkələrimiz arasında ikitərəfli münasibətlərlə yanaşı, beynəlxalq təşkilatlar çərçivəsində də münasibətlərin yüksək səviyyədə olduğunu qeyd edərək, beynəlxalq təşklatlarda seçkilər zamanı ölkəmizin namizədliklərinin Qırğızıstan tərəfindən dəstəkləndiyinə görə təşəkkürlərini bildirib.
Qırğızıstanın xarici işlər nazirinin müavini M.Abakirov çıxışında Azərbaycan xalqını Müstəqillik Günü münasibətilə təbrik edib və ən xoş arzularını çatdırıb. Azərbaycan ilə Qırğızıstan arasında münasibətlərin böyük tarixi olduğunu qeyd edən nazir müavini, hazırda Azərbaycan ilə Qırğızıstan arasında olan strateji əlaqələrin ölkələrimizin rəhbərlərinin dəstəyi ilə daha yüksək mərhələyə qalxdığını vurğulayıb. O, Azərbaycanın sürətlə inkişaf etdiyini və dünyanın güclü dövlətlərindən birinə çevrildiyini söyləyərək, Qırğızıstanın Azərbaycanın bu uğurlarına sevindiyini vurğulayıb. M.Abakirov bildirib ki, ölkələrimizin xalqları haqlı olaraq qardaş xalqlar adlandırılır: “Bizi sıx dostluq və qohumluq əlaqələri, ortaq mənəvi dəyərlər, tarix, mədəniyyət və ənənələr birləşdirir. Qırğızıstan-Azərbaycan münasibətlərinin böyük gələcəyi var”.
Tədbirdə Azərbaycanın nailiyyətlərini, görməli yerlərini, turizm imkanlarını və tarixi abidələrini əks etdirən videoçarxlar nümayiş etdirilib.
Ziyafət zamanı Azərbaycanın mədəniyyəti və incəsənətinin təbliği məqsədilə simfonik kvintetin ifasında canlı olaraq dahi Azərbaycan bəstəkarlarının klassik musiqiləri və milli musiqi alətləri ansamblının ifasında milli mahnılarımız və rəqslərimiz təqdim olunub.
Bölmənin digər xəbərləri
