ADU-da Çin Elm və Texnologiya İşçiləri Günü qeyd edilib
Bakı, 28 may, AZƏRTAC
Azərbaycan Dillər Universitetinin (ADU) Konfutsi İnstitutu Çin Elm və Texnologiya İşçiləri Gününə həsr olunmuş "Azərbaycan-Çin elmi əlaqələri" adlı tələbə-elmi seminar keçirib.
Bu barədə AZƏRTAC-a ADU-dan məlumat verilib.
Seminarda mühazirə oxuyan Konfutsi İnstitutunun direktoru Rafiq Abbasov qeyd edib ki, tədbirin əsas məqsədi Çində elmi və texniki işçilərin güclü qlobal elmi-texniki güc quruculuğuna, elm-texnologiya sahəsində yüksək səviyyədə özünütəminata nail olmasına verdiyi böyük töhfəni qeyd etməkdi. Belə ki, Çində keçirilən ənənəvi Elm bayramı çərçivəsində elmi və texniki işçilərlə görüşlər, elmin populyarlaşdırılması ilə bağlı səyyar mühazirələr, elmi və texniki məhsulların sərgiləri və Milli İnnovasiya Mükafatının mükafatlandırma mərasimləri keçirilir.
O, həmçinin qeyd edib ki, Azərbaycan xalqının Ümummilli Lideri Heydər Əliyevin Çinə tarixi səfəri, Çin Sosial Elmlər Akademiyasındakı çıxışı və səfər zamanı imzalanmış elmi-texniki əməkdaşlıq müqaviləsi təbiət və sosial elmlər sahəsində Azərbaycan-Çin elmi əlaqələrinin təməlini qoyub və strategiyasını müəyyən edib. Son illərdə ölkələrimiz arasında elmi mübadilə uğurla inkişaf etmişdir. Azərbaycanın akademik müəssisələrinin aparıcı alimləri Çində keçirilən müxtəlif sahələrdə 100-ə yaxın elmi konfransda fəal iştirak edib, Azərbaycan Milli Elmlər Akademiyası ilə Çin Sosial Elmlər , Çin Mühəndislik və Kənd Təsərrüfatı Akademiyaları arasında elmi əməkdaşlıq müqaviləsi imzalanıb, ayrı-ayrı ixtisaslaşmış elmi institutlar arasında birbaşa tərəfdaşlıq əlaqələri yaradılıb. O cümlədən AMEA Mərkəzi Elmi Kitabxanası və Çin Milli Kitabxanası vasitəsilə elmi məlumat mübadiləsi təmin edilib.
R.Abbasov ölkələrimiz arasında elmi əməkdaşlığın prioritet sahələrinin qədim İpək Yolu boyunca Azərbaycan-Çin ticarət və mədəni əlaqələri tarixinin, xüsusən də ədəbi əlaqələrin tarixinin, Çinin siyasi və iqtisadi inkişafının müasir məsələlərinin, qədim Çin fəlsəfəsinin, Çinin siyasi, hüquqi və sosial-iqtisadi islahatların aparılması təcrübəsinin, Çinin modernləşdirmə siyasətinin və ekoloji sivilizasiyanın qurulmasının tədqiqi olduğunu vurğulayıb. Bu baxımdan, yüksək texnologiya və innovasiya sahəsində dünya liderlərindən biri olan Çinin alimləri ilə elmi informasiya mübadiləsinin genişləndirilməsi və birgə elmi tədqiqatların aparılmasının Azərbaycan üçün böyük maraq doğurduğu bildirilib.
Bölmənin digər xəbərləri
