Elmi konfrans: Heydər Əliyev və Azərbaycanda intellektual potensialın davamlı inkişafı
Bakı, 3 may, AZƏRTAC
Mayın 3-də Azərbaycan Dövlət Pedaqoji Universitetinin (ADPU) Səbail Rayon İcra Hakimiyyətinin (RİH) və Yeni Azərbaycan Partiyasının (YAP) Səbail rayon təşkilatının birgə təşkilatçılığı ilə “Heydər Əliyev və Azərbaycanda intellektual potensialın davamlı inkişafı” mövzusunda respublika elmi konfransı keçirilib. Tədbir ümummilli lider Heydər Əliyevin anadan olmasının 96-cı ildönümünə həsr olunub. Konfrans Azərbaycan Respublikasının dövlət himninin səsləndirilməsi ilə başlanıb.
AZƏRTAC xəbər verir ki, konfransı giriş sözü ilə açan ADPU-nun rektoru, professor Cəfər Cəfərov ulu öndər Heydər Əliyevin Azərbaycan təhsilinin, elminin inkişafında müstəsna xidmətlərindən danışıb. Bildirib ki, xalqımızın müdrik oğlu Heydər Əliyevin respublikamıza rəhbərlik etdiyi 1969-1982-ci illər Azərbaycan təhsilinin intibah dövrü kimi səciyyələndirilir. Ulu öndər Heydər Əliyevin Azərbaycanda birinci dəfə rəhbər seçilməsinə qədər texniki peşə məktəblərində cəmi 20 min gənc təhsil alırdı. Heydər Əliyev ölkəyə rəhbər seçildikdən sonra isə onların sayı 90 minə çatdı, bütün rayonlarda texniki-peşə məktəbləri yaradıldı. 1969-1982-ci illərdə 1 milyon 500 min uşağın 1 milyon 100 mini yeni tikilmiş məktəblərdə təhsil almağa başladı. Həmin dövrdə məktəbəqədər tərbiyə müəssisələrinin sayı 1600-dən 1875-ə çatmışdı. Təkcə 1969-1982-ci illərdə Azərbaycanın şəhər, kənd və qəsəbələrində 700-ə qədər yeni məktəb binası tikilib istifadəyə verilmişdi. Heydər Əliyevin şəxsi təşəbbüsü və təşkilatçılığı ilə Azərbaycanda 1970-1982-ci illərdə 5 yeni ali təhsil müəssisəsi yaradılmış, ali məktəb tələbələrinin sayı isə 70 mindən 100 min nəfərə çatmışdı. Heydər Əliyev istedadlı azərbaycanlı gənclərin keçmiş SSRİ-nin qabaqcıl və nüfuzlu ali təhsil müəssisələrində təhsil almalarına da xüsusi diqqət yetirirdi. Ötən əsrin 80-ci illərinin əvvəllərində hər il 1000-1400 nəfər azərbaycanlı gənc respublikamızdan kənarda ali təhsil almağa göndərilirdi. Halbuki 1969-cu il üçün həmin rəqəm cəmi 47 idi. Məhz Ulu Öndərin şəxsi təşəbbüsü ilə 1970-1980-ci illərdə keçmiş SSRİ-nin 50-dən artıq böyük şəhərinin 170-dən çox nüfuzlu ali məktəbində respublikamızın xalq təsərrüfatı, elm, təhsil və mədəniyyətinin 80-dən artıq sahəsini əhatə edən və zəruri ehtiyac duyulan 250-dən çox ixtisas üzrə 15 mindən artıq azərbaycanlı gənc təhsil alıb. Heydər Əliyev həmin uzaqgörən siyasəti azərbaycanlı hərbi mütəxəssislərin yetişdirilməsi sahəsində də həyata keçirib. Təkcə 1982-ci ildə keçmiş SSRİ-nin ali hərbi məktəblərinə 550 azərbaycanlı gənc qəbul edilib. Cəmşid Naxçıvanski adına Hərbi Liseyin, eləcə də ADPU-da ibtidai hərbi hazırlıq və fiziki təlim fakültəsinin yaradılması Heydər Əliyevin vətənpərvər fəaliyyəti ilə bağlıdır. Qüdrətli siyasi xadim Heydər Əliyev respublikamızda siyasi hakimiyyətə qayıtdıqdan sonra təhsil müəssisələrinin normal fəaliyyət göstərməsi və təhsilin milli tərəqqimizin əsas amilinə çevrilməsi üçün ölkəmizdə geniş islahatlar proqramı işlənib hazırlandı. Heydər Əliyev müəllim peşəsini yüksək qiymətləndirərək demişdir: “Mən Yer üzündə müəllimdən yüksək ad tanımıram”. Ulu Öndərin bu fikri fəaliyyətimizin leytmotivini təşkil edir.
Qeyd olunub ki, Prezident İlham Əliyevin xüsusi diqqət və qayğısı nəticəsində təhsil müəssisələri yeniləşir, inkişaf edir. Müasir dövrdə yüksəkixtisaslı mütəxəssislərin hazırlanması çox vacibdir. Müəllim hazırlığı ölkəmizin milli təhlükəsizliyi məsələsidir. Azərbaycan məktəblərini yüksəksəviyyəli pedaqoji kadrlarla təmin etmək üçün əzmlə, fədakarlıqla çalışmalı, bu istiqamətdə bütün səylərimizi gücləndirməliyik.
YAP Səbail rayon təşkilatının sədri, Milli Məclisin deputatı, professor Şəmsəddin Hacıyev, rayon icra hakimiyyəti başçısının müavini Eldar Ağayev Heydər Əliyevin xalqımız və dövlətimiz qarşısında böyük tarixi xidmətlərindən danışıblar.
Tədbirdə ulu öndər Heydər Əliyevin və Prezident İlham Əliyevin elm və təhsillə bağlı fikirlərinin səsləndirildiyi videoçarx nümayiş etdirilib.
Konfransda elm və innovasiyalar üzrə prorektor, professor Asəf Zamanov “Heydər Əliyev və Azərbaycan elmi” mövzusunda, Azərbaycan dilçiliyi kafedrasının müdiri, professor Nizami Xudiyev “Azərbaycan dilinin inkişafında Heydər Əliyevin rolu” mövzularında məruzələrlə çıxış ediblər. Məruzələrdə Heydər Əliyevin elmin, təhsilin inkişafındakı əvəzsiz rolundan, eləcə də Azərbaycan dilinin qorunmasında və təbliğində göstərdiyi böyük xidmətlərdən danışılıb.
ADPU-nun rektorunun müşaviri, professor Vilayət Əliyev, YAP-ın Səbail rayon təşkilatının “Pedaqoqlar” ərazi ilk təşkilatının sədri, professor Himalay Qasımov, ümumi tarix kafedrasının müdiri, AMEA-nın müxbir üzvü, professor Vəli Əliyev çıxış edərək Heydər Əliyevin tarixi xidmətləri ilə bağlı fikirlərini bölüşüblər.
Bölmənin digər xəbərləri
