Elşad İsgəndərov: Gənclərin COP 29 prosesində iştirakı Azərbaycanın iqlim diplomatiyasına yeni dinamika gətirir
Bakı, 5 fevral, AZƏRTAC
Gənclərin nümayəndələrinin COP29 komandasında təmsil olunması yalnız prosesə əlavə enerji qazandırmır, eyni zamanda, müzakirə edilən məsələlərin insan hüquqları və gələcək nəsillərin maraqları prizmasından dəyərləndirilməsinə imkan yaradır.
AZƏRTAC xəbər verir ki, bu fikri Xarici İşlər Nazirliyinin xüsusi tapşırıqlar üzrə səfiri Elşad İsgəndərov “II Qoşulmama Hərəkatı Gənclər Həftəsi”ndə “Diplomatiyada elm, siyasət və kommunikasiyanın rolu” mövzusunda panel sessiyada çıxışı zamanı deyib.
Elşad İsgəndərov qeyd edib ki, Azərbaycanın COP29 çərçivəsindəki fəaliyyəti iqlim diplomatiyasının humanitar ölçülərini də əhatə edir və bu yanaşma gənclər çempionları tərəfindən peşəkar şəkildə təşviq olunur. Gənclərin fəal iştirakı komanda daxilində məsuliyyət hissini və gələcəyə yönəlik baxışı daha da gücləndirir.
İqlim diplomatiyasında elmin roluna toxunan Elşad İsgəndərov bildirib ki, müasir diplomatiya təkcə siyasi mövqelərin deyil, elmi arqumentlərin və faktların üzərində qurulur:”Diplomatiyanın əsas mahiyyəti tərəflərin maraqlarını düzgün müəyyənləşdirmək, ortaq məxrəcə gəlmək və uzunmüddətli, dayanıqlı razılaşmalar əldə etməkdir”.
Səfir əlavə edib ki, əldə olunan razılaşmalar yalnız məcburi şərtlər altında deyil, qarşılıqlı fayda və etimada əsaslanmalı, eyni zamanda, icra mexanizmləri ilə təmin olunmalıdır. O vurğulayıb ki, elmi biliklər bu prosesdə həm danışıqların məzmununa, həm də qərarların davamlılığına birbaşa təsir göstərir.
Elşad İsgəndərov qeyd edib ki, müasir elmi yanaşmaların tarixən formalaşmış ixtisaslaşma modelindən daha çox inteqrativ və kompleks düşüncə tərzinə doğru inkişafı, iqlim dəyişmələri kimi qlobal problemlərin həllində diplomatiya üçün yeni imkanlar yaradır.
Bölmənin digər xəbərləri
