Əmək və əhalinin sosial müdafiəsi naziri Əli Nağıyev Beynəlxalq Əmək Təşkilatının (BƏT) Moskva bürosunun direktoru xanım Paulina Baret-Ridi və büronun proqram üzrə əməkdaşı İrina Melexi qəbul etmişdir. 

Nazir bildirmişdir ki, müstəqil Azərbaycan özünün milli maraqlarını təmin etmək məqsədi ilə beynəlxalq təşkilatlarla da əlaqələrini genişləndirir. Azərbaycan Respublikası BƏT-in 54 Konvensiyasını ratifikasiya etmişdir. Ölkəmiz 2004-cü ildən gec olmayaraq Avropa Sosial Xartiyasına qoşulacaqdır. BƏT ilə Azərbaycan arasında 2001-2002-ci illər üçün imzalanmış yeni əməkdaşlıq proqramında birgə fəaliyyətin əsas istiqamətləri, eləcə də forma və metodları müəyyən olunmuşdur.

Xanım Paulina Bater-Ridi dedi ki, Azərbaycanla əməkdaşlığı daha da genişləndirmək məqsədi ilə bu ilin iyununda Bakıda BƏT-in milli təmsilçisi vəzifəsini təsis etmək nəzərdə tutulmuşdur. Bundan əlavə, əməyin mühafizəsi və təhlükəsizliyi, məşğulluq üzrə mütəxəssis vəzifələri də təsis olunacaqdır. Bildirildi ki, gələn ay BƏT-in Avropa və Mərkəzi Asiya üzrə regional direktoru cənab Fridrix Butlerin Bakıya səfəri gözlənilir.