İQTİSADİYYAT
Əməkdar memar: Paytaxtda tikilən binaların seysmikliyinə önəm verilir
![Əməkdar memar: Paytaxtda tikilən binaların seysmikliyinə önəm verilir](/files/2024/2/1200x630/1716804637175979925_1200x630.jpg)
Bakı, 27 may, AZƏRTAC
Bakının seysmoaktiv ərazidə yerləşməsi sakinləri hər zaman narahat edən məsələlərdən biri olub. Bəs paytaxtda və regionlarda inşa edilən binalar neçə ballıq zəlzələyə davamlıdır?
Bu aktual məsələ ilə bağlı AZƏRTAC-a açıqlama verən Azərbaycan Memarlar İttifaqının üzvü, əməkdar memar Nəriman İmaməliyev bildirib ki, Bakı şəhəri 8 ballıq seysmik zonada yerləşir.
Onun sözlərinə görə, respublikada 9 ballıq seysmik regionlar da var və buraya Şamaxı rayonunu aid etmək olar.
“Son 10-12 ildə paytaxtda hündürmərtəbəli binaların tikintisində bu məsələyə çox böyük önəm verilir. Fövqəladə Hallar Nazirliyi və digər müvafiq qurumlar tərəfindən daim konstruktiv yoxlamalar aparılır. Bütün inşaat materialları laboratoriyalarda yoxlanıldıqdan sonra onların istifadəsinə icazə verilir, kommunikasiya məsələlərinə xüsusi diqqət yetirilir. Hətta xaricdən gələn mütəxəssislər digər region ölkələrindən fərqli olaraq Azərbaycanda bina tikintisi sahəsində seysmik problemlərin daha etibarlı və yüksək səviyyədə həll edildiyini bildirirlər”, - deyə Nəriman İmaməliyev vurğulayıb.