İQTİSADİYYAT
ƏMƏKDAŞLIQ SAZİŞİ İMZALANMIŞDIR
İyulun 29-da Əmək və Əhalinin Sosial Müdafiəsi Nazirliyində Beynəlxalq Qırmızı Xaç Komitəsi ilə Əməkdaşlıq sazişinin imzalanması mərasimi keçirilmişdir.
Mərasimdə əmək və əhalinin sosial müdafiəsi naziri Əli Nağıyev və BQXK nümayəndəliyinin başçısı Floran Korna çıxış edərək, saziş haqqında ətraflı məlumat verdilər.
Sazişə əsasən, Qarabağ müharibəsi nəticəsində yaralanmış və amputasiya olunmuş insanlara ortopedik ləvazimatlarla yardım göstəriləcək, Gəncə və Naxçıvan şəhərlərində reabilitasiya xidmətləri təşkil ediləcək, 1827 nəfər üçün 3265 protez və ortozlar onların ölçüsünə görə uyğunlaşdırılacaq, milli və beynəlxalq sertifikatlar verilməklə 7 texnik hazırlanacaqdır. Bu il ərzində BQXK-nın qismən maliyyə yardımı ilə Gəncədə bu təşkilatın avadanlıq və ləvazimatları ilə təchiz olunacaq Protez-Ortopedik Bərpa Mərkəzin filialının inşası, Bərpa Mərkəzinə, onun Gəncə və Naxçıvan filiallarının ildə 1000 protez və ortoz üçün material və komponentlərlə təmin edilməsi nəzərdə tutulmuşdur. Protezləşdirmə və ortozlaşdırma sahəsində milli mütəxəssislərin hazırlanmasına kömək məqsədi ilə iki nəfər həkim xaricə kursa göndəriləcəkdir.
Sazişi əmək və əhalinin sosial müdafiəsi naziri Ə.Nağıyev və BQXK nümayəndəliyinin başçısı F.Korna imzaladılar.