Emin Əmrullayev: Azərbaycanın elm və təhsil sistemi yeni inkişaf mərhələsinə qədəm qoyub
Bakı, 3 noyabr, AZƏRTAC
Son illərdə ölkədə həyata keçirilən islahatlar Azərbaycan təhsil sistemini regionda texnoloji inkişafın mərkəzinə çevirib. Rəqəmsallaşma və süni intellekt istiqamətində elmi strategiyaların formalaşdırılması, bu sahələrdə tədqiqat potensialının gücləndirilməsi dövlət siyasətinin əsas prioritetlərindəndir. Xüsusilə idarəetmə, sosial innovasiyalar və insan kapitalının inkişafı istiqamətində yanaşmaların dərinləşdirilməsi qarşıya qoyulan mühüm vəzifələrdəndir.
AMEA-dan AZƏRTAC-a bildirilib ki, bu barədə elm və təhsil naziri Emin Əmrullayev Azərbaycan Milli Elmlər Akademiyasının (AMEA) 80 illik yubileyinə həsr olunmuş tədbirdə çıxışı zamanı məlumat verib.
Nazir ölkə rəhbərliyinin elm və təhsil sahəsinə göstərdiyi yüksək diqqət və qayğıdan danışıb. O, Ulu Öndər Heydər Əliyevin Azərbaycan elm və təhsilinin müasir əsaslar üzərində formalaşmasında və bu sahələrin strateji inkişaf istiqamətlərinin müəyyənləşdirilməsində oynadığı müstəsna rolu diqqətə çatdırıb. Vurğulayıb ki, bu siyasi və ideoloji xəttin Prezident İlham Əliyev tərəfindən ardıcıl şəkildə davam etdirilməsi nəticəsində son illərdə ölkəmizin elm və təhsil sistemi yeni inkişaf mərhələsinə qədəm qoyub. Bu inkişafın məntiqi nəticəsi kimi, ölkənin müxtəlif bölgələrində, o cümlədən işğaldan azad edilmiş ərazilərdə elm və təhsil infrastrukturunun yenidən qurulması istiqamətində mühüm addımlar atılır.
Onun sözlərinə görə, Qarabağ Universitetinin fəaliyyətə başlaması təkcə yeni bir ali təhsil ocağı deyil, həm də Azərbaycanın suverenliyinin və qürurunun bərpasını simvolizə edən tarixi hadisədir. Bu universitetin yaradılması azad edilmiş torpaqlarda elmin, bilik və yaradıcılığın dirçəlişini təcəssüm etdirir.
Emin Əmrullayev çıxışında Azərbaycanın bir dövlət olaraq qarşısında dayanan geniş imkanlardan bəhs edib. Bildirib ki, ölkəmiz mövcud elmi, intellektual və texnoloji potensialını səmərəli şəkildə səfərbər etməklə qısa müddət ərzində regionun lider ölkəsinə çevrilmək imkanına malikdir. Bu məqsədlə insan kapitalının inkişafı, innovasiyaların dəstəklənməsi və rəqəmsal transformasiyanın sürətləndirilməsi istiqamətində həyata keçirilən siyasət ölkənin gələcək inkişafına mühüm töhfə verəcək.
Nazir “Azərbaycan Respublikasının 2027–2030-cu illərdə sosial-iqtisadi inkişaf strategiyası” layihəsində elm və ali təhsillə bağlı müəyyənləşdirilmiş əsas istiqamətlərdən bəhs edərək vurğulayıb ki, qarşıdakı dövrdə ali təhsilin əhatəliliyinin və əlçatanlığının artırılması, tədris məzmununun müasirləşdirilməsi, keyfiyyət göstəricilərinin yüksəldilməsi, beynəlxalq rəqabətlilik və akademik mobilliyin gücləndirilməsi prioritet istiqamətlər kimi müəyyənləşdirilib. O qeyd edib ki, dövlət-özəl tərəfdaşlığı çərçivəsində elmin və ali təhsilin inkişafı, elmi potensialın gücləndirilməsi və maliyyə dayanıqlılığının təmin edilməsi bu strategiyanın əsas hədəflərindən biridir. Bu baxımdan bilik və texnologiyaların effektiv transferi 2027–2030-cu illərdə Azərbaycan elminin aparıcı istiqamətlərindən biri olacaq.
Emin Əmrullayev elmi kadr hazırlığının müasir tələblərə uyğun təşkilinin yeni yanaşmalar və layihələr əsasında həyata keçirildiyini söyləyib.
Nazir çıxışının sonunda qarşıdan gələn Zəfər Günü və AMEA-nın 80 illik yubileyi münasibətilə Akademiya kollektivini və bütün Azərbaycan elmi ictimaiyyətini təbrik edib. Bildirib ki, Zəfər Günü xalqımızın birliyi, iradəsi, elmi-intellektual potensialı və müzəffər Ordumuzun qəhrəmanlığı ilə qazanılmış tarixi Qələbəsinin rəmzidir. Azərbaycan elminin yeni mərhələdə inkişafı və intellektual potensialın gücləndirilməsi məhz bu Zəfər ruhunun davamı kimi ölkəmizin gələcək yüksəlişinə xidmət edəcək.
Bölmənin digər xəbərləri
