AZƏRTAC-ın müxbiri xəbər verir ki, aprelin 26-da Avropa Şurası Parlament Assambleyası Bürosunun iclasında qurumun yaz sessiyasının gündəliyi sonuncu dəfə nəzərdən keçirilmişdir. İclasda “təcili müzakirələr” bəndi üzrə gündəlikdə duran Hollandiyanın sığınacaq istəyən şəxslərə münasibətdə yeni siyasəti məsələsi əvəzinə, Ermənistanda vəziyyətlə bağlı məsələnin salınması da müzakirə olunmuşdur. Gərgin keçən müzakirələr zamanı Ermənistan tərəfi məsələnin gündəliyə salınmamasına cəhd göstərməsinə baxmayaraq, iştirakçıların əksəriyyəti Ermənistan üzrə debatların keçirilməsinin lehinə səs vermiş və sessiyanın gündəliyinin müzakirəsində həmin məsələyə yenidən baxılmasını qərara almışlar.
Ermənistanla bağlı məsələnin növbəti sessiyada müzakirə edilməməsi barədə Ermənistan nümayəndə heyəti rəhbərinin göstərdiyi cəhd baş tutmamışdır. Macarıstanlı deputat erməni həmkarının təklifinə qəti etirazını bildirmiş və məsələnin təxirə salınmadan, məhz bu sessiyada müzakirəsinin vacibliyini xüsusi vurğulamışdır.
Məsələnin belə şəkil aldığını görən AŞPA-nın sədri Piter Şider hər iki təklifi səsə qoymuşdur. 106 deputat məsələnin indiki sessiyada müzakirə olunmasının lehinə, 42 deputat isə əleyhinə səs vermiş, 2 deputat isə bitərəf qalmışdır.
