ERMƏNİSTAN DÖVLƏT AVİASİYA ŞİRKƏTİ MÜFLİSLƏŞMƏ ƏRƏFƏSİNDƏDİR
“Azad Avropa” və “Azadlıq” radiostansiyaları öz müxbiri Karina Kələntəryanın belə bir xəbərini yaymışdır ki, yaxın vaxtlarda Ermənistan Dövlət Aviasiya Şirkəti özünün müflisləşəcəyini bəyan edəcəkdir. Bu xəbərdən aydın olur ki, dövlət iqtisadiyyatın bu mühüm sahəsinə nəzarəti zəiflətmişdir və uçuşların sayı azaldığından aviatorlar daim zərər çəkirlər. Bu da təbiidir, çünki, müxbirin dediyi kimi, Ermənistanda müasir uçuş və ekologiya təhlükəsizliyi tələblərinə cavab verən mükəmməl hava gəmiləri yoxdur.
Erməni jurnalistinin xəbərində deyilir ki, son illər 20 milyon ABŞ dolları məbləğində borc götürən və aviaşirkəti ən korrupsiyalı dövlət təşkilatlarından birinə çevirən rəhbərlik indi onu hərraca çıxarmaq istəyir.
Bu xəbər bizi istər-istəməz öz mülki aviasiyamız barədə düşündürdü. Sevindirici haldır ki, “Azərbaycan Hava Yolları” Dövlət Konserni sürətlə inkişaf edir və Azərbaycan Avropa ilə Asiya arasında birləşdirici vəsiləyə çevrilmiş, bütün layihələri, o cümlədən Böyük İpək yolunun dirçəldilməsi layihəsini uğurla həyata keçirmək üçün yaxşı infrastruktur yaratmışdır. “Azərbaycan Hava Yolları” Konsernində təhlükəsizlik sistemi, kadr hazırlığı bütün beynəlxalq tələblərə cavab verir. Bundan əlavə, Avropanın ən müasir beynəlxalq hava limanlarından birinə malik olan ölkəmiz ikinci belə limanı Naxçıvanda tikməyə başlamışdır və o da regionda ən yaxşı hava limanlarından biri olacaqdır.
Bölmənin digər xəbərləri
